Konservativit: Piumasaqaat pissutsinut piviusunut naapertuutinngilaq

Silap pissusaata allanngoriartornera, kulturikkut uumasunullu atatillugu Kalaallit Nunaanni taama malunnarsereertigisoq, nunarsuatsinni CO2-mik mingutsitsineq annikillisarniarlugu sulissutiginiakkat anguniarlugit isumaqatigiissutiginiakkamut kalaallit peqataarusussanngippata eqqumiiginassaaq. Taamaammat silap pissusaata allanngoriartornerata akiorniarneranut Kalaallit Nunaata aamma siunissami akisussaaqataalluni suleqataanissaa ilimagaara, Per Ørum Jørgensen oqarpoq.

Kalaallit Nunaanni siuariartorneq ineriartornerlu ukiuni kingullerni ingerlanneqarsimavoq, Kalaallit Naalakkersuisuisa Danskillu Naalakkersuisuisa isumasioqatigiinnerisigut mingutsitsivallaannginnissaq anguniaatigalugu. Inuiaqatigiit iluanni ineriartortitsineq CO2-mik mingutsitsinermik kinguneqartaraluartoq, Kalaallit Nunaanni mingutsitsinngitsunik nukissiorsinaaneq anguneqarluarsinnaavoq, soorlu erngup nukinga atorluarlugu. CO2-mik mingutsitsinaveersaaqqissaarluni ineriartortitsiniarneq ingerlanneqarluarsinnaavoq, tamanna danskinit aamma uppernarsineqareerpoq, konservativit silap pissusaa Kalaallit Nunaallu pillugit oqaaseqartartuat, Per Ørum Jørgensen oqarpoq.

Silap allanngoriartornera akiorniarlugu suliniutit pillugit oqallinnermi, Folketingimi ilasortaq, Lars-Emil Johansen akulerulluni Kalaallit Nunaanni sulisitsisut sulisartullu kattufii isumaqatiginerarpai.

- Allat mingutsitsinerisa kingunipilui Kalaallit Nunaanni manna tikillugu malunniuttarput, taamaammat Kalaallit Nunaanni ineriartortitsiniarneq mingutsitsisartutoqqanit killilersorneqassappat pissusissamisuunngilaq, Lars-Emil Johansen Danmarkip Radioanit apersorneqarluni oqarpoq.

Danskit ministeriat, Connie Hedegaard suli qisuariaateqanngilaq.