Kommunit tallimat kattukkusupput

Nunatsinni kommunit avannarliit tallimat isumaqatigiissutigaat siunissami kattunnissaq pitsaasuussasoq.

Aammattaarli kissaatigaat massakkut kommuniusut tamarmik kommunerujussuarmi ataatsimik ilaasortaatitaqarnissaat qulakkeerneqassasoq.

Tamannali Hans Enoksenip isumassarsiatsialaannginnerarpaa.

Qaammatip ataatsip matuma siornagut Upernaviup, Uummannap, Ilulissat, Qasigiannguit aamma Aasiaat borgmesteriisa Pituffimmilu najugallit siunnersuisoqatigiivisa isumaqatigiissutigaat, siunissami kommunerujussuarmi ataatsimuulerusullutik.

Tamanna pillugu Namminersornerullutik Oqartussanut allagaqarput aappassiariilernertillu oqaluttuaralugu kiisalu kattunnissaminnut piumasaqaatitik saqqummiullugit.

Ilaatigut kommunerujussuarmi massakkut kommunit ilaasortaatitaqarnissaat qulakkeerusuppaat, illoqarfiit tamarmik taamaalillutik tusaaniarneqarniassammata, anguniagartik pillugu taama allapput.

Isumassarsiaq tamanna naalakkersuisut siulittaasuata Hans Enoksenip isumaqatiginngilaa.

Taamatut illoqarfiit ilaasortaatitassaannik inissaqartitsereernikkut, ilaasortaatitap kommunerujussuaq sullinnagu, illoqarfigisani kisiat sullinnialissagaa Hans Enoksenip akissummini ernummatigaa.

- Taamatut aaqqissuussinikkut qinikkat illoqarfigisamik soqutigisaannik aallussinerunissaat ernumanartoqarpoq. Tamanna kommunerujussuarni pilersinniarneqartuni ataatsimoornermik pilersitsiniarnermut akornutaaginnassaaq, Hans Enoksen akissummini taama allappoq.

Kommunit siunnersuumminni allapput kommuninngortussaq ateqassasoq Avannaa, kommunalbestyrelsilu 17-inik ilaasortaqassasoq,

KANUKOKA nittartakkamini taama allappoq.