Kommunit suleqatigiilernissaat qanilliartorpoq
Nuup Kommuneata aamma Maniitsup Kommuneata qanimut suleqatigiilersinnaanerat imaluunniit kattussinnaanerat pillugu periarfissat sukumiinerusumik misissuiffigineqassapput.
Nuummi Maniitsumilu Aningaasaqarnermut Ataatsimiititaliat Kitaani Kommuneqarfiit marluusut assigiissutaat ataatsimoortumillu soqutigisaat takusinnaavaat.
Takornariaqarneq aatsitassarsiornerlu pillugit qanimut suleqatigiinnissaq qanittuararsuuvoq.
Ataatsimititaliat taakku marluk ippassaq naapipput, qanimut suleqatigiinnissaq tassani isumaqatigiissutigineqarluni.
Kommunit kattunneqarnissaannut aallarnersaatitut taanna isigineqarsinnaavoq.
Maniitsup aamma Nuup Kommuneani Aningaasaqarnermut Ataatsimiititaliaasa isumaqatigiissutigaat, Aaqqissuussaanermut Ataatsimiititaliap piffissalersuutaa sivikippallaartoq. Ataatsimiititaliat isumaqarput, kommunalbestyrelsemut ilaasortat nutaat innuttaasullu akornanni apeqqut pillugu sukumiisumik eqqartueqatigiinnissamut inissaqartitsisoqartariaqartoq.
