Kommunip niviarsiaqqat sumiginnarsimavai
Angut taanna meeqqanik atoqateqartarsimasutut eqqartuussaasarsimanera ilisimaneqarpoq, Qeqqatalu Kommuniata meeqqannut pinerliisimannginnermut uppernarsaat inatsisitigut piumasaqaataasoq piumasarisimagaluarpagu, Niviarsiat inuusuttuaqqat ilaatigut Maniitsumeersut pinngitsaalineqarsimassanngikkaluarput.
Qeqqata Kommuniatalumi ilaqutariinnut sullissinermut ilinniartitaanermullu pisortaata Henrik Soloyip kukkusoqarsimanera ilumoornerarpaa.
- Pisimasoq taanna allaffimmi kukkussutaavoq. Taama pisoqarsimanera ajuusaarnaqaaq, kisianni tassa sukaterisoqassaaq. Aamma sulisunut kinguneqareerpoq. taama pisoqartussaanngilaq. Taama iliortoqareersorlu suleriaatsit tamaasa misissoqqippavut. Aamma malittarisassat qanoq ittuuneri meeqqanullu pinerliisimannginnermut uppernarsaammik piniarsimanngikkaanni suna kingunerusinnaasoq, sulisunut erseqqissaatigereerpavut, Henrik Soloy oqarpoq.
Tassa kommuni inatsit malillugu meeqqanut pinerliisimannginnermut uppernarsaammik piumasaqarsimagaluarpat, pisoq alianartoq pinngitsoortinneqarsimassagaluarpoq.
Uppernarsaammimi takuneqarsimassagaluarpoq, Kasper Brandt Kangaatsiami meeqqanik marlunnik pinngitsaaliisimasutut 1989-imi eqqartuussaasimasoq. Paamiuni meeqqamik 1996-imi pinngitsaaliisimasutut eqqartuussaasimavoq. Aamma taamatut Sisimiuni 2007-imi Kangaatsiamilu 2011-mi.
Kisianni Qeqqata Kommuniata ilaqutariinnut sullissinermi iliniartitaanermullu pisortaq neriorsuivoq, Taama kanngunartuliortoqaqqissanngitsoq.
- Taama pisoqaqqissaanngilaq. Tamanna upperilluinnarpara. Aamma tamanna kommunimi immikkoortortani tamani sulisunut tamanut erseqqissaatigeqqissaareerparput, Henrik Soloy Qanoruumut oqarpoq.
