Kommunit Namminersorlutillu Oqartussat sapaatip-akunnikkaarlugit ataatsimiittalissapput
- Tassa suliassat assigiinngitsut misissorpavut aamma KANUKOKA-mik ataatsimeeqatiginninnermi borgmesterit sisamat peqataaneranni paasissutissat assigiinngitsut aamma ilanngullugit nalilersuiffigivavut, Anthon Frederiksen aallartippoq.
- Soorunami naalakkersuisut soqutigisarilluinnarparput kommunini kattussuussinermi aamma kommuninut pitsaaqutissat - aaqqissuusseqqinnermi isumaliutissiissummi eqqartorneqareersut - piviusunngortinneqarnissaat, oqarpoq.
Anthon Frederiksen aamma erseqqissaavoq, borgmesterit KANUKOKA-llu kingullermik ataatsimeeqatigiinneranni isumaqatigiissutigisimagitsik, isumaqatigiinniarnerit ingerlatillugit, suliat pillugit eqqartuinerit tusagassiuutitigut ingerlatissanngikkitik. Taamaakkaluartoq nussugassatut isumaqatigiissutaareersut arlalinngoreersut makku eqqaavai:
- Innuttaasunik sullissinermi allaffissornermut tunngasut aamma IT-mut tunngasut kommuninut ukiortaami nuunneqassapput. Tulliattullu innarluutilinnut tunngasut, annertusisamik immikkut ilinniartitsinermut tunngasut, PPR aamma imigassamik ajornartorsiutilinnut katsorsaanermut tunngasut aappaagu juulip aallaaqqaataani kommuninut nuunneqassapput.
Suliassaqarfiillu nussornerat suli ukiuni arlalinni ingerlassasoq oqaatigaa.
- Suliassat suliassaqarfiillu assigiinngitsut 2013-ip immaqaluunniit kingusinnerusukkut nussorneqarnerat ingerlanneqartussaavoq, taamaammat suliassat imaaliallaannaq naammassineqarsinnaanngillat, soorlu tamanna suliassaqarfiit aaqqissuuteqqinneqarnerannut tunngasumik isumaliutissiissummi ersarissumik takuneqarsinnaasoq, Anthon Frederiksen naggasiivoq.
Kommunerujussuit sisamat borgmesterii Namminersorlutillu Oqartussat aallartitaat Kommuneqarfiit Kattuffiata KANUKOKA-p Sisimiuni qaammatip tulliani ataatsimeersuarnerani tullianik naapissapput.