Kommunit Namminersorlutillu Oqartussat ataatsimoortumik tapiissutit isumaqatigiissutigaat

Kommunit kattuffiata KANUKOKA-p siulittaasuata Martha Abelsenip aningaasaqarnermullu naalakkersuisup Vittus Qujaukitsup, nunatsinni kommuninut ataatsimut tapiissutitut 2014-imoortut pingasunngornermi isumaqatigiissutigaat. Namminersorlutik Oqartussat kommuninut tapiissutaat katillugit 1.147.4 millioninik aningaasartaqarput.
Allattoq Peter Troelsen, Simon Uldum
juulip 04-at 2013 09:10

Naalakkersuisut erniat tamakkiisumik ilanngaatigineqarsinnaanerinik ukiakkut ataatsimiinnermi eqqusseqqittussaammata, kommunit akileraarutitigut annaasassaannut taarsiutissat aappagumut isumaqatigiissummut ilanngunneqarsimapput. Aammattaaq kommunit innarluutillit innarluutilinnullu ilaqutaasut atugaannik pitsanngorsaanermut ilassutitut aningaasartuutaat ilanngunneqassapput.

Qujaukitsup 2014-imut aningaasanut inatsit saqqummiukkuniuk, illoqarfiit pingaarnersaata avataani sanaartornikkut ilinniartoqarfitsigullu nukittorsaanissamut suliniutinik aamma imaqassaaq. Nuna tamakkerlugu ineriartortitsinermik aallartisaasoqarnissaa Naalakkersuisunit neriuutigineqarpoq.

Namminersorlutik Oqartussat kommunillu siunissami ineriartortitsinissamut periarfissat pillugit eqqartuiniarlutik naapittussaapput. Oqaloqatigiinnerup ammasumik ingerlanneqarnissaa pilersaarutaavoq, taamaaliornikkullu kommunit Namminersorlutillu Oqartussat akornanni suleqatigiinnissamik isumaqatigiissutip nutarsarnissaa aallartisarneqassalluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq