Kommunit kattussuunnissaanut atsioqatigiineq

Ullumi Kalaallit Nunaata oqaluttuarisaaneranut pingaaruteqartumik atsioqatigiittoqarpoq, atsioqatigiittut tassaallutik Naalakkersuisut siulittaasuat Hans Enoksen aamma Kommuneqarfiit Kattuffianni siulittaasoq Søren Alaufesen.

Atsioqatigiissutigineqartoq tassaavoq kommunit kattussuuppata suliassat Namminersornerullutik Oqartussaniit kommuninut tunniunneqarnissaannut tunngasoq.

Hans Enoksenip oqaatigaa kommunerujussuit sisamanngorpata sulisunik soraarsitsiortortoqarnavianngitsoq.

- Atsioqatigiinnitsinni pingaarnerpaaq tassaavoq januaarip aallaqqaataani 2009-imi kommunit kattunnissaat. Taannalu sioqqullugu suliassat aaqqissuuteqqinnissaannut piffissalersuinerillu paatsuugassaajunnaarlugit suliarineqarlutik.

Ullumi atsioqatigiinnerput pingaaruteqartorujussuuvoq, tassani suliat ersarinnerusumik takuneqarsinnaanngorput, Hans Enoksen oqarpoq.

Kommunerujussuit pilersinneqarpata aningaasanik qanoq sipaaruteqarniarpisi?

- Uani qularnanngilaq annertuumik sipaarutissaqartugut, ingerlatsinerit akisoqisut arlariilluta ingerlappavut tassami Namminersornerullutik Oqartussat ingerlataqarput Kommunini ingerlanneqartunik. Kommunit suliarisinnaasaat amerlasoorujussuit uagut Namminersornerullutik Oqartussani ingerlappavut. Taamaalilluni suliassat utikajaartillugit ingerlanneqarlutik, taamalillunilu piffissarujussuaq aningaasarpassuillu atorneqartarlutik. Taanna qimakkusupparput siunissami sulineq ataasiinnaanerusumik ingerlanneqalissalluni. Suliassat annertunerpaat kommuninut nuunneqartussaaput, taamaalilluni allaffissornikkut aningaasartuutit sipaarneqartussanngussapput, Hans Enoksen oqarpoq.

Kommunini sulisut eqqorneqassappat?

- Ilaatigut aarleqqutigineqarpoq kommunini sulisut ikilisarneqarsinnaanerat, taamanna siunertaanngilaq. Naalakkersuinikkut uagut illersorsinnaangilarput sulisut soraarsinneqarnissaat. Sulisut namminneq soraarartarnerat tunngavigalugu sulisunik ikilisaasoqarumaarpoq, Hans Enoksen oqarpoq.

Hans Enoksenip ilanngullugu oqaatigaa aappaagu apriilip arfineq pingajuanni kommuninut qinersisoqassasoq.