Kommunit kattussuunnissaannut piareeersaleruttorput
Kommunit 18-it kommuninut sisamanut kattussuunnissaat pillugit maannakkorpiaq kommunit piareersaleruttorput. Qeqqani kommunerujussuassaq, Paamiunit, Nuummit, Ivittuunit Ammassalimmit Ittoqqortoormiunillu akuuffigineqartussaq, pilersaarummik ataatsimoorussamik piareersimatitsilerput, aammalu innuttaasunut paasisitsiniaanissamut piareerput.
Kommunit kattussuutsinneqarnissaat ungasigunnaarpoq, ullunilu pingasuni kommunit Nuuk, Ivittuut Paamiut, Ammassalik Ittoqqortoormiullu ataatsimeeqatigiipput, ilaatigut anguniagassat takorluukkat pilersaarutillu eqqartueqatigiissutigalugit. Eqqartueqatigiinnerlu iluatsilluartutut nalilerneqarpoq, anguniagassanullu ilaapput, aningaasatigut ingerlatsinermi siuarsaanissaq, aammalu piginnaanngorsaanissaq avatangiisinilu siuarsaanissaq.
Aningaasatigut siuarsaanissami eqqarsaatigineqarpoq, takornariaqartitsinermik siuarsaanissaq, ilaatigut illoqarfiit akornanni timmisartumik angallannermi akinik apparsaanikkut. Piginnaanngorsanissaq eqqarsaatigalugu, inuusuttut tamarmik ilinniagaqalersimanissaat anguniarneqarpoq.
Avatangiisit eqqarsaatigalugit siuarsaanissami eqqarsaatigineqarpoq internet-i aqqutigalugu ilinniartitsisalernissaq.
Kommunit taakkua tallimat kattunnissaat eqqarsaatigalugu anguniakkat innuttaasunut paasisitsiniutigineqassapput. Paamiuni borgmesteri Lars Sørensen, radioavis-imut ima oqarpoq:
- Takornariaqarneq aatsitassaqarneq ilinniartitaanerlu pingaarnerutissallugit aalajangerpugut, aammalu innuttaasunut paasisitsiniaanissaq siunniussimallutigu. Ilaatigut lokalradio-t aammalu innuttaasunik ataatsimiisitsisarnissat ingerlanneqartassapput, aamma nittartagaq pilersippaarput, taannalu iserfigineqarsinnaavoq naqinnerit ukua atorlugit: www.ikaartut.gl. Aamma suleqatigiissitaliorpugut politikkikkullu aqutsisussat aamma pilersinneqarlutik. Ataatsimoorluta isumasioqatigiisitsissamaarpugut, aammalu suliffeqarneq pillugu isumasioqatigiisitsissalluta, Lars Sørensen oqarpoq.
Timmisartumik angalasarneq qanoq akikinnerulersinneqarsinnaanersoq suleqatigiissitap nutaap maannakkut misissornialerpaa.
Borgmesterit tallimaasut aalajangerput, kommunit tamarmik kommunalbestyrelsemut aallartitamik ikinnerpaamik ataatsimik peqassasut. Aamma aalajangerneqarpoq, illoqarfiit tamarmik immikkut borgmestereqartassasut, aammalu ineriartortitsinissaq anguniarlugu orniguttarfinnik pilersitsisoqassasoq aalajangerneqarpoq.
.
