Kommunit ilaat suuteqanngillat ilaallu oqqapput

Kommunini tamani kommunalbestyrelset iluminni aappaagumut aningaasaqarnissartik piareersaleruttorpaat.

Kommunit ilaat aningaasaateqarpallaannginnamik assoroorput, kommunit ilaasa qanoq ingerlanerat tipisiorparput. Siullermik Qasigiannguit borgmesteriat Jess Svane ima oqarpoq.

- Quianartunngorlugu oqartarpugut, aningaasaateqanngingaaratta oqqassutissaqanngilagulluunniit, kisianni isumaqatigiilluinnaqqinnaarluta aaqqissorparput, Jes Svane oqarpoq.

Nanortallip borgmesteria Kristine Raahauge oqarpoq, aningaasaqarnertik eqqarsaatigalugu annertunerusumik assortuussutissaqaratik.

Kommunalbestyrelselli tamarmik isumaqatigiittuaannangillat, Aasiaat kommuneani kommunalbestyrelsemi ilaasortaq Peter Olsen borgmesterilu Enok Sandgreen Tusaat Aasiaat aqqutigalugu innuttaasut tusaasinnaasaannik aningaasaqarnermik ingerlatsineq pillugu sakkortutigisumik assortuupput.

Ilanngutassiami sakkortuumik qalleraattumillu assortuunnerat ilanngupparput.

- Suleqatigiinnerluttutut immitsinnut uanga taarusunngilara. Suleqatigiissagaanni arlaatigut ajortussarsiortoqarsinnaanngillaq, Enok Sandgreen oqarpoq.

Aperaarput, siunissami sinneqartooruteqarniartillutik taama sakkortutigisumik oqaloqatigeeriaaseqartarunik anguniagartik angusinnaaneraat, ima akivoq:

- Soorunami, Siumukkut Atassutikkut Attaviitsullu amerlanerussuteqartuupput taakkulu massakkut Aasiaat kommuneani sulineq aquppaat. Illuatungiliuttut qanorsuaq mamaagisaqarunik iliuuseqarsinnaapput. Kisianni toqqissilluta pitsaasumik kommunip ingerlanneqarnissaa sulissutigaarput taamaattumik aarlerissutissaqanngilanga, Aasianni borgmesteri Enok Sandgreen oqarpoq.