Kommunit Avannaamiut Ilulissani ippassaq oqallipput

Sumi tamaani inuit ilaat oqarpallattarput ataatsimiittut qalliuniuppallaartut, ilaat eqqartugassaminnik sukumiisumik aallussillutik ingerlalluarpaluttut.

Ilami kommunerujussuanngornissamut apeqquterpassuit sukumiisumik sammineqartussaammata ilaat tipisiulaarpagut.

Assersuutitut kommunerujussuanngornissamut kommunaldirektøri ataasiinnaassasoq qularnanngilaq, taamaammat kommunaldirektørit ilaat Benedikte Mølgaard ima aperaarput, tamanna aallaavigalugu eqiteriniarneq qanoq innersoq, imalu akivoq:

-Massakkut soorlu oqartoqareernikuuvoq sulisunik ikilisaasoqassanngilaq kisiannili allatut aaqqissuussineq ingerlanneqassalluni tassa ullumikkut paasisarput aammalu paasitinneqarnerput taannaavoq taamaammat ernumassuteqarnata ingerlavugut aammalu Namminersornerullutik Oqartussaninngaaniit uku suliassat allat nutaat aamma tigusassagut eqqarsaatigalugit una taamaallaat kisimi apeqqutaalertussaassaaq atorfimmi sumi inissisimanitsinni ilumut illoqarfitsinniit allamut nuutsinneqassaagut taanna kisimi apeqqutaalersutut uanga isumaqarpunga.

Tassa Avannaata kommunerujussuata aaqqissugaanera ukiup tulliata naanerani piareersimasussaq politikerinik atorfilinniillu ulapputigineqaleruttorpoq.

Atagu inunnik isumaginninnermut tunngasut aamma paasiniaavigilaariartigik?

Leo Rosing sunaana ilissi sammigissi?

-Tassa inunnik isumaginninneq sammivarput, qulequtaralugit utoqqarnut, innarluutilinnut aammalu siusinaarluni sulisinnajunnaarnersiutilinnut tunngasut.

Angusaqartutut misigivisi?

-Ilaana, soorunalimi immaqa apeqquserneqarsinnaavoq suna anguneripput, kisianni eqqartukkavut soqutiginarluinnarput, aamma avannaani inuttaasut sullinneqarnissaata assigiimmik soorunalimi inummiit inummut nalilersorneqartarneri qanoq malitassaqarnissaq annertuumik eqqartorneqarpoq, ukununnga aatsaannguaq taariikkatsinnut assigiinngitsunut pingasunut.

Atuarfeqarnermut, teknikkeqarnermut inuutissarsiutinullu aaqqissuusseqqinnerit sukumiisumik eqqartorneqartut aamma ilagaat.