Kommunit atissaat unammissutigineqaleruttorput
Kujataata kommuunissaata atissaanik ilisarnaatissaanillu unammisitsineq maajip 31-annut killeqassasoq, Kujataani ikaarsaariarnermi ataatsimiititaliap aalajangiuppaa. Qeqqata kommuunissaata atserneqarnissaanut ilisarnaatissaanillu toqqaanissaq maajip 20-anni ikaarsaariarnermi ataatsimiititaliamit aalajangiiffigineqassaaq. Qeqqata kommuunissaata atissaanik siunnersuutinik 164-inik nassitsisoqarpoq, ilisarnaatissaanillu 75-inik siunnersuuteqartoqarluni, Qeqqata kommuunissaani ataqatigiissaarisutut siunnersorti Hans Henrik Olsen aviisimut Sermitsiamut oqarpoq.
Avannaata kommuuunissaata atissaanik ilisarnaatissaanillu unammisitsinissamut atugassat ulluni tulliuttuni tamanut nassiussuunneqassapput, unammisitsinermilu juulip aallaqqaataa killiliunneqarluni.
Kangia Kitaata kommuunissaata atserneqarnisaanut ilisarnaaserneqarnissaanullu unammisitsinissaq piareersarneqaleruttorpoq. Ikaarsaariarnermi ataatsimiititaliap allaffeqarfiani sulisoq Kiista Lynge Høegh Sermitsiamit apersorneqarluni oqarpoq, aningaasaqarnermut ataatsimiititaliami kommuunimik atsiinissaq ilisarnaasiinissarlu, sapaatip akunnerata tulliani ataatsimiinnermi oqaluuserineqassasoq.
