Naalakkersuisut Kommuneqarfiillu Kattuffiat Kanukoka 2007-imi kommuninut ataatsimoortumik tapiissutissat pillugit ullumi atsioqatigiipput.
Tamanna koruuninik 784 millioninngajalluinnarnik kommuninut 18-inut atugassanik kinguneqarpoq, siornarnit amerlanerulaarlutik. Kanukokap siulittaasua Lars Karl Jensen:
-Tassa pisarnitsitut ukiut tamaasa kommunit kattuffianninngaanniit Namminersornerullutik Oqartussat assigiinngitsunik isumaqatigiinniarfigisarpagut, uani kommunit ingerlatsereerneranni tapiissutit massakkut isumaqatigiissutigivagut.
-Angusagut tassaapput akit allanngoriartuutaannut assigisaannullu kommuninut nammatassanngortussaajunnaarlugit aaqqitat isumaqatigiissutiginerat.
-Tassa assersuutigalugu illuatungeriit isumaqatigiissutigisaat aallaavigigutsigu, angusat pitsanngoriaateqartippagut, akinut akissarsianullu 2,34 procentimik. Taamaalillutik 2007-imi 18,1 millioni koruuninik naleqartumik isumaqatigiissuteqarpugut
Ingerlatseqatigiiffiit akileraarutaat 35 procentimiit 30 procentimut appartinniarparput kommunimut nammakkiisussaajunnaarlugu aamma aaqqiissutigineqarfigineqarpoq aamma uanga pitsaasutut nalilerusuppara.
- Ingerlatseqatigiiffiit nalunngisatsitut nuna tamakkerlugu akileraartarput taakkulu sullinneqarnerat kommunemiilluni, taamaattumik kommunit sullissinermut aningaasartuutigisassaat taakkunannga aamma matussuserneqarnissaat Kanukokaminngaanniit eqqumaffigineqarput, KANUKOKA-p siulittaasua Lars Karl Jensen taama oqarpoq.
Ingerlatseqatigiiffiit akileraarutaasa apparnerat pillugu kommunit isertitakinnerulernerannut matussutaasunik aappagu 2008-miit 14,5 millioni koruuninik ataatsimoortumik tapiissutit qaffanneqassaapput. Namminersornerullutik Oqartussat KANUKOKA-llu aamma isumaqatigiissutigaat, ilinniartitaanermi suliniutinut aningaasaliissutissat 38,8 millioni koruuniussasut.