Kommunip utoqqaat nunamut pisuttuartinniarai

Tamanna Kommuneqarfik Sermersuup iliuuseqarfiginiarlugu, nammineerlutik pinngortitamukarsinnaanngitsunut aggustip 28-ani pisuttuartitsinialerpoq.

- Nalunngilarput utoqqarpassuarnut, piffissaq tamangajaat isersimasartunut, pinngortitamut qaqqamut immamullu aliannaariarnissaq qanoq pingaaruteqartigisoq. Qanga pisimasut utersaartutut ittarput, taamatullu misigisaqarnissamut Kommuneqarfik Sermersooq ikiuukkusuppoq. Aamma timip atornera peqqinnartuummat, Mikael Kemner, Kommuneqarfik Sermersuumi timimik sungiusaasoq taama oqarpoq.

Taamaammat aggustip 28-ani pisuttuartitsinermi inunnik kaassuartakkanik issiavinnik ingerlatsisussanik imaluunniit pitsorluttunik ikiuuttussanik Kommuneqarfik Sermersooq pissarsiorpoq.

- Assersuutigalugu Nuummi qanigisat imaluunniit innuttaasut utoqqaat arlaat ikiorsinnaavatit, kommuni taama allappoq, isumassarsiallu illoqarfinni allani atorneqarnissaa aamma neriuutiginerarlugu.

- Ikiuunnikkut kikkut tamarmik nuannersumik misigisaqarluarnissaannik – namminerlu timigissaatigalutit – ikiuussinnaavutit, kommuni allappoq.

Kajumissutsiminnik suleqataarusuttut qanoq nalunaarsinnaanersut nittartakkatsinni atuarneqarsinnaavoq.

Kajumissutsiminnik suleqataarusuttut Mikael Kemnerimut e-mailikkut uunga nalunaarsinnaapput: mikm@sermersooq.gl

Kajumissutsimik sulerusullutit nittartakkakkut aamma sunngiffik.gl aqqutigalugu nalunaarsinnaavutit