Peqatigiiffik Isumassortit: Kommunip ulloq unnuarlu angerlarsimaffiit meeqqat angerlarsimaffiup avataanut inissinneqartartut pillugit suleqatiginerusariaqarpai
Meeqqat inuusuttullu allamut inisinneqarsimasut kommuneqarfik sermersuumi angerlartinneqartartut amerliartornerini isumaginninnikkut perorsaanikkullu ikiortit suleqataalluarnerat peqqutaaqataasoq, Kommuneqarfik Sermersooq apriilip ulluisa 23-anni saqqummiussivoq.
Meeqqat inuusuttullu angerlarsimaffiup avataanut inissinneqareerlutik angerlartut ilarpassui ulloq unnuarlu angerlarsimaffinnut utertarput.
Tamanna peqatigiiffiup Isumassortit misilittagaraa.
Taamaattoqarneranut kommunimiit meeqqanut inuusuttunullu sullissinerup naammaginannginneranik peqquteqartoq, KNR-imut allakkatigut isornartorsiuivoq:
-Ilaatigut nalaattarparput, aalajangiinerit ilaqutariit atugaasa killiffii meeqqallu pisariaqartitaat piviusorsiortumik nalilersorluarneqanngitsut, taakkua allapput nangillutillu:
- Ersarissumik tapersersorneqarnissaannut pilersaarusiorfigineqarnissaannullu tunngasut naammaginartumik qulaajaqqaarnagit pisarsimasutut isumaqarfigaagut, Isumassortit KNR-imut allallutik nassuiaapput.
Peqatigiiffimmi Isumassortimi ulloq unnuarlu angerlarsimaffiit tallimat imminut pigisut Pitu, Pakkutaq, Qaamasoq, IMP aamma Amarok ilaasortaapput. Pakkutaq Maniitsumiittuusoq sinneri Nuummiittuupput. Taakkua meeqqanut inuusuttunullu ulloq unnuarlu angerlarsimaffiit ukioqanngitsuniit 18-it tungaanut ukiulinnut inissaateqarput.
Angerlarsimaffinni taakkunani tallimaasuni meeqqat inuusuttullu 75-it missaaniittut 20 procentii ataasiarlutik angajoqqaarsianeereerlutik ulloq unnuarlu angerlarsimaffimmut inissinneqartarput, affaalu marloriarlutik angajoqqaarsiaqareertarput, 30 procentiilu pingasoriarlutik angajoqqaarsiaqareertarput.
Peqatigiiffiup 2025-mi misissuinera taama inerneqarpoq.
Pitsaanerusumik suleqatigiittoqartariaqartoq
Meeqqat inuusuttullu angajoqqaaminniit ulloq unnuarlu angerlarsimaffinnut uteqqialeraangamik ilarpassui inersimasunut tatiginnissinnaajunnaartartut toqqissisimajunnaartartullu, peqatigiiffik aamma allappoq.
- Meeqqallu tassani eqqugaaqqittarput pinasuartumillu ulloq unnuarlu angerlarsimaffinnut inisseqqittariaqalersarneri pisarlutik.
Taamaammat Sermersuup Kommuniata meeqqanik inuusuttunillu ulloq unnuarlu angerlarsimaffinniit angajoqqaanut utertitsilersigani ulloq unnuarlu angerlarsimaffinnik pitsaanerusumik suleqatiginnittariaqartoq Isumassortit isumaqarput.
Assersuutigalugu meeqqap inuusuttulluunniit angerlannginnerani angerlarfissaa ilumut meeqqamut inuusuttumulluunniit naleqqunnersoq misissorneqartassasoq, peqatigiiffik kaammattuivoq.
Peqatigiiffiullu ilaasortai nalilersuisareerput:
- Ulloq unnuarlu angerlarsimaffiit sullissinerminni ilisimasaat nalilersuutaallu naammattumik ilanngunneqarneq ajortut takusarparput.
Nangipporlu:
- Akerlianik malitassat saneqqutiinnarlugit iliuuseqapallattarnerit takussaalernikuullutik. Taamaaliornerni kikkut eqqugaasarpat? Meeqqat, Isumassortit allapput.
Kommuneqarfik Sermersooq Isumassortiniit isornartorsiorneqarnera pillugu KNR-ip kommune attavigaa, kommunilli isornartorsiutit isummerfigerusunngilaai.
-Kommunimit saaffiginnissutivit isornartorsiuineri maana akissuteqarfigerusunngilagut, inissiisarnermi suleqatigisagut toqqaannaq suleqatigerusukkatsigit tusagassiuutitigut ingerlannagu.