Kommunip Arctic Green Food isornartorsioraa
Arctic Green Food piffissami kingullermi isornartorsiorneqartorujussuuvoq, 11 millionit koruuninik Namminersorlutik Oqartussanit tapiiffigineqartaraluarluni, tunitsivimmi ammatinnissai ajornartorsiutigisorujussuuvaa.
Maannalu Kommuneqarfik Sermersuup sakkortuumik isornartorsiorpaa. Ittoqqortoormiuni Arctic Green Food, 2008-mili tunitsiveqarsimanngitsoq, Kommuneqarfik Sermersuumit oqaatigissavarput. Tamanna kisitsisinit pisortatigoortunit tamanit takuneqarsinnaasunit uppernarsarneqarpoq, kommunip borgmesteria, Asii Chemnitz Narup, tusagassiuutinut nalunaarummini allappoq.
- Suliffeqarfiup, najukkani piniartut tunitsiveqarnissaannik qulakkeerinninnissamut pisortanit ukiut tamaasa tapiissutisisartup, siunertaminik naammassinnissinnaannginnera akuerineqarsinnaanngilaq, borgmesteri nangilluni allappoq.
Nunatsinni illoqarfiit avinngarusimanerpaat ilaanni inuuniarnissamut atugassarititaasut Kommuneqarfik Sermersuumit sutigut tamatigut pitsanngorsarniarneqartut, borgmesterip oqaatigaa.
- Sumiiffimmi inuussutissarsiutinik piumaneqartorujussuarnik pisuussutaatilimmi inuussutissarsiutit ineriartortinneqarnissaannut AGF-ip akisussaaffimmik ilaanik timitaliilluni naammassinninnissaa naatsorsuutigaarput, Asii Chemnitz Narup naggasiivoq.