Kommunip ajornartorsiornini nammineq anigorniassavaa

Inuit ataasiakkaat imminnut akerleriinnerat, kommunimi pissaaneqarniunneq, uuliasiorneq pillugu pikkorissarnernut 4,5 millioni koruunit atorneqartut paatsuungassutigineqarnerat, ukiup sinnerani sipaartariaqarnermut uisakajaarneq immaqaluunniit allarluinnaq?

Aamma Kommunit nakkutilliisoqarfiat KANUKOKA-lu maannakkut iliuuseqarniarpasinngillat.

Inatsimmik unioqqutitsisoqarsimanersoq suli misissorneqanngilaq.

- Susoqasimanersoq soorunami paaserusupparput, ataatsimiinnermit imaqarniliaq maanna utaqqivarput. Aamma kommunit namminersortuunerat tunngaviusumik ataqqivarput. Nunami namminermut naalakkersuisoqarfimmi Kommunit nakkutilliisoqarfiata allattoqarfianniit taama oqartoqarpoq.

Tassangaanniit KNR-ip akissutisiaa naapertorlugu, borgmesterit qaqugukkulluunniit aalajangersinnaavaat, suliassaminnik naammassinninnissamut periarfissaqannginnerlutik.

Pingaarluinnarpoq aamma oqaatigisallugu borgmesterip kisimiilluinnarluni aalajangersinnaammagu, atorfini aalluteqqissanerlugu, kisianni Jess Svane taamaaliunngilaq. Taarsiullugu ataatsimiinnerup kinguartinneqarnissaa kissaatigaa.

Kissaat taanna amerlanerussuteqartut akuersaarpaat.

Kisianni ataatsimiinnissamik 257.000 koruuninik nalilimmik borgmesteri sooq kinguartitsinnissamut iliuuseqarnersoq suli nalunarpoq.

Aningaasartuutit borgmesterip illersorpai oqarluni Kommunalbestyrelsi missingersuusiornissamut isumasioqatigiissimammat asuliinnaq atorneqanngitsut.

Kisianni aningaasat asuliinnaaq asuliinnaanngitsorluunniit atorneqarpata, Qaasuitsup Kommuniani innuttaasut suli erseqqisumik paasinngilaat qinikkat akornanni susoqarnersoq.

Tassalu Kommunit nakkutilliisoqarfiannit imaluunniit kommunit kattuffiannit ikiorneqanissamik ilimasussanngillat.

KANUKOKA-miit naatsumik oqarput, maannakkut akuliuliutissagunik iluaqusiinatik ajoqusiinnissartik annilaanngatigigitsik.