Kommuninut tapiissutissat isumaqatigiissutigaat
Kommuninut ataatsimoortumik tapiissutissat isumaqatigiissutit 830 millioni koruuniussapput, taakkunannga 33,3 millioni koruunit akit akissarsiallu qaffakkiartornerannut iluarsiissutaassallutik.
Illuatungeriit aamma isumaqatigiissutigaat, ilinniartitaanikkut immikkut iliuutsinut kommunit akileeqataassutissaat aappaagumiit 77,7 millioni koruuniussasut, tassaallutik 2006-imi kommuninut ataatsimoortumik tapiissutit pillugit isumaqatigiissutip imarisaanik nangitsinermut tunngassutillit.
Aaqqissuussaanermik iluarsaaqqinnermi suliassanik aamma Namminersornerullutik Oqartussanit kommuninut nutaanut nussuisoqartussaavoq, soorlu innarluutilinnik isumaginninneq, PPR / annertusisamik immikkut ittumik atuartitsineq, imerajuttunik katsorsaaneq sanaartornerlu.
Suliassat pineqartut kommunerujussuanngortunit ukiortaaq 2010-mi aatsaat tigujartuaarneqarsinnaajumaartut ilisimagineqarpoq.
Kommunerujussuanngornermi siunertat ilagaat innuttaasunik kiffartuussinerup pitsanngorsarnissaa, Taamaattumik ”Pisortat ataatsimut IT-mik aqutsisoqatigiivinik” Namminersornerullutik Oqartussat kommunillu peqataaffigisaannik pilersitsisoqarpoq. Aningaasanut inatsimmi IT-p ineriartortinnissaanut atatillugu 2008-mut 2009-mullu immikkut ukiumut 5 millioni koruuninik aningaasaliisoqareerpoq.