Kommuninut naalagaaffimmit tapiissutit isumaqatiginninniutigineqaleruttorput

Kommunit 18-it aappaagussamut naalagaaffimmit tapiissutissaat isumaqatigiinniutigineqaleruttorput, aggustillu qaammataani naammassineqarnissaat ilimagineqartoq KANUKOKA-mit nalunaarutigineqarpoq. Isumaqatigiinniarnermili aaqqinniagassat arlaqaalupput.

Isumaqatigiinniarnermi pingaartinneqartunut ilaavoq ilinniartitaanerup iliuuseqarfigineqarnissaa.

Ilinnartitaanermut tunngatillugu kommuninut aningaasaliissutigineqartartut 39 million koruuniusut aappaagu tunniunneqaratik, Naalakkersuisut siunnersuuteqarput aningaasaliissutit namminersornerullutik oqartussanit katillugit 150 million koruunit missaannik amerlineqassasut. Ataatsimut isigalugu ilinniartitaanermut aningaasartuutit sisamaraarterutaat, isumaqatigiissut nutaaq naapertorlugu kommuninit akilerneqartalissapput

Isumaqatigiinniutaasoq alla tassaavoq, akileraartarnermut ingerlatsinermullu tunngatillugu kattussuutsitsinissamut tunngasoq. Taannalu 26 million koruuninik immikkut akeqassaaq, aappaagulu januaarip aallaqqaataani mamminersornerullutik oqartussanit taanna tiguneqassaaq.

Siusinaartumik soraarnerussutisiallit aningaasarsiaat kingumoortumik qaffaavigineqarnissaanut aningaasat 16 million koruunit immikkoortinneqassapput.

Aamma sullivinnik nakkutilliisoqarfiup maleruagassaasa sukaterneqarnerisa kingorna, kommunit aningaasartuuteqarnerulernissaat qanoq pineqassanersoq suli isumaqatigiissutigineqanngilaq.

Aamma sullivinni isumannaallisaasunik ilinniartitsinissaq pisariaqassaaq, taakkualu aamma aningaasartuutaassallutik.

Ukioq manna kommuninut naalagaaffimmit tapiissutit katillugit 775,4 million koruuniupput.