Kommuninut ataatsimoortumik tapiissutit 761,5 millioni koruunit
761,5 millioni koruunit. Kommuninut ataatsimoortumik 2008-mi tapiissutissat taama amerlassuseqarput.
Kommuninut ataatsimoortumik tapiissutit pillugit isumaqatigiissut Aningaasaqarnermut Naalakkersuisumit, Hans Enoksenimit, aamma KANUKOKAMI siulittaasumit, Søren Alaufesenimit, ullumi atsiorneqarpoq.
Ataatsimoortumik tapiissutit 27 millioni koruuningajalluinnarmik ukioq-mannamit ikinnerupput. Tamatumunnga pissutaavoq, utoqqalinersiat pillugit inatsisartut peqqussutaat nutaaq utoqqalinersianut annertussuserititat qaffanneqarneranik imaqarmat. Tamanna kommunini akileraarutitigut isertitaqarnerulerujussuarnermik kinguneqarpoq. Tamanna tunuliaqutaralugu kommuninut ataatsimoortumik tapiissutit 2008-mi 26,7 millioni koruuninik ukiunilu tulliini taamatuttaaq ikilisinneqarnissaat Naalakkersuisut KANUKOKA-llu isumaqatigiissutigaat.
Kommunilli 14,5 millioni koruuninik taarsiiffigineqarnissaat susassaqartut isumaqatigiissutigaat, tassa ingerlatseqatigiiffiit ukioq-manna akileraarutaat 35 procentimiit 30 procentimut appartinneqarmat.
Kommunit 1,8 millioni koruuninik aamma taarsiiffigineqassapput, pissutigalugu pinaveersaartitsinermi siunnersortit Paarisamit kommuninut ukiortaamiit nuunneqarnissaat isumaqatigiissutigineqarmat.
Aammattaaq pisortanit ikiorsiissutit pillugit inatsisartut peqqussutaanni nutaami ilaatinneqartoq naapertorlugu pisortanit ikiorsiissutisiallit qaniginerpaasat ilineqarnerannut atatillugu angerlarnerannut aningaasartuuteqarnermut kommunit taarsiiffigineqartarnissaat atsioqatigiittut isumaqatigiissutigaat.
