Kommunimut qinersinissamut 334-t qinigassanngortipput
Taamaattorli qinigaasussat qassiunerat eqqarsaatigigaanni kommunalbestyrelsimut qinigaarusuttut amerleriarsimapput.
Kingullermik kommunimut qinersisoqarmat 168-it qinigaasussaasut, 745-nit pilerngunneqarput. Ukiormanna 72-it qinigaasussaapput qinigassanngortittullu 334-ullutik.
Namminersornerullutik Oqartussat qinersinermut ataatsimiititaliaanit allaffiup pisortaa Leif Scharling ilisimatitsivoq, Avannaata Kommunianut qinigassanngortittut amerlanerpaasut, tassa 119-ugamik. Kangia-Kitaani kommunissamut qinigassanngortittut 116-iupput Kujataata kommunissaani 58-iullutik Qeqqatalu kommunissaani 41-t qinigassanngortipput.
Partiit Atassut, Inuit Ataqatigiit, Demokraatit, Kattusseqatigiit Partiiat aamma Siumut kommuninngortussanut sisamanut tamarmik qinigassanngortitaqarput, taakkua saniatigut Kangia-Kitaata kommunissaani marlunnik qinigassanngorteqatigiittoqassaaq. Qinigassanngorteqatigiit ataatsit Qinigassanngorteqatigiit Ivittuunik taaguutillit pingasunik qinigassanngortitaqarput aamma Partii nutaaq qanittukkut aallartinneqartoq Sorlaat Partiiat marlunnik qinigassanngortitaqarpoq.