Kommune Qeqertalimmi suleqatigiinnissamik isumaqatigiissuteqartut
-Tassa naatsorsuutigilluinnarparput ullumikkut atsioqatigiissalluta, Kommune Qeqertalimmi Inuit Ataqatigiit gruppianni siulittaasoq, Hans Aronsen KNR-imut ataasinngornermi taama oqarpoq.
Maannali isumaqatigiissusiarineqartoq, IA-p Siumullu isumaqatigiissutigisaannit allaanerungaassanngitsoq, IA-meersoq Hans Aronsen oqarpoq.
Kommune Qeqertalimmi IA-p Siumullu politikkikkut toqqammaviusumik isumaqatigiissutaata suliarineqarnerani Atassummeersoq Naja Kristensen oqaloqataasimasoq Hans Aronsen paasissutissiivoq.
- Taamaattumik massakkut taanna ingerlateqqiinnartussaavarput annertunerusumik allannguuteqarfiunngitsumik, Hans Aronsen taama oqarpoq.
Atassummeersoq Naja Kristensen KNR-imit pissarsiariniaraluaratsigu iluatsinngilarput.
Suleqatigiinneq ilungersunartoq
Sermitsiaq.ag naapertorlugu Kommune Qeqertalimmi isumaqatigiikkunnaarnermut pissutaasoq taassavoq Inuit Ataqatigiit Atassutillu kommunalbestyrelsimi suleqatigiinnerannik Siumup apeqqusiillunilu suleqatigiinnermit tunuarniarluni sioorasaaruteqarsimanera.
- Siumut allaffigaarput suleqatigiinnerput taamaatittoq, tamatumalu kingorna Atassummut isumaqatiginninniarnerit aallartillugit. Suleqatigiinniarnerput ilungersunartoq Siumut nalunaaruteqarpoq. Nalunaarutaat tusaatissatut tiguarput, taakkulu suleqatiginissaannut tunngavissaqarunnaartoq nalilerparput. Taamaattumik Siumut suleqatigiunnaarparput, Hans Aronsen (IA) Sermitsiamut taama oqarpoq.
Kommune Qeqertalimmi Siumup gruppiani siulittaasoq, Kristian Broberg, Sermitsiaq.ag-mit aamma oqaloqatigineqarpoq. Taanna ima oqarpoq:
- Suleqatigiinnerput pillugu apeqqusiisariaqalersimavugut, tassami suleqatigiinnitsinnut tunngatillugu arlalitsigut isornartoqartipparput. Attaveqatigiittoqanngilaq, IA attavigiuminaappoq. Ukiut marluk matuma siorna isumaqatigiissuterput malillugu sulisoqanngilaq. Kisianni isornartorsiorluta aperigatta IA qanoq piva? Oqariartuuterput tusaatissatut tiguaat, suleqatigiinnerpullu taamaatilugu, Kristian Broberg taama isornartorsiuivoq.