Kommuni Kujalleq kukkunerit pillugit: Uggornaq
Kukkunerit assigiinngitsorpassuit ugguaatigineqarput.
Assersuutigalugu sulianut erninermut atatillugu sulinngiffeqarnermut tunngasunit 15-iusunit aqqaneq marluk kukkusumik akilerneqarsimasut kukkunersiuisartut BDO-kunneersut paasisimavaat.
Aammattaaq akissarsititsinerni ukiuni siuliinisulli akuerineqarsinnaanngitsumik akissarsititsinerni kukkusoqartarsimavoq, isumaqatigiissutimmi nutaat pillugit malittarisassat malinneqartarsimanngimmata.
Assersuutigalugu kommuni atorfilittami ilaannut 300.000 koruuninik amerlanaarlugit akissarsititsisimavoq, pineqartumummi akissarsinermi tapiissut ukiuni arlalinni marloriaatinngorlugit tunniussorneqartarsimapput.
- Soorunami uggornarpoq kukkunersiuisut kukkunernik nassaarsimammata, kukkunerilli tamakku kommunip pingaartillugu aaqqiivigerusuppai, siunissami taama pisoqaqqinnginniassammat, kommunaldirektør Frank Hedegaard Jørgensen KNR-imut allakkatigut oqaaseqaateqarpoq.
Sulianimmi kukkuluttortarnerit kommunimi innuttaasuinnarnik eqquinerlunngillat.
Aamma atuaruk Kommune Kujalleq sakkortuumik isornartorsiorneqartoq
BDO-p nalunaarummini aamma kommuni isornartorsiorpaa Namminersorlutik Oqartussanit peqqissaanermut atasumik aningaasat pissaraluani 685.000 koruunit pissarsiarinngitsoorsimammagit.
Aqutsisut aamma isornartorsiorneqartunut ilaapput, suliat malittarisassat malillugit ingerlanneqarnersut naammattumik nakkutigisimannginnamikkit. Kukkunersiuisartut tamannarpiaq ukiuni arlaqalersuni uparuartortarsimavaat.
Maannali aqutsisut ikiortissaqalerput. Kommuni kujallermi kommunaldirektøri nalunaarpoq, aqutsisut siorna aningaasaqarnermut pisortartaarsimasut, aqutsisullu ingerlatsinermi pisortat suleqatiginialersimagaat kukkunerit kukkunersiuisut uparuagaat aaqqiiviginiarlugit, pisortaq ilaatigut taama allappoq.