Kommuni eqqartorneqassaaq
![Qaasuitsup Kommunia](/sites/default/files/styles/image_934x467/public/article_images/qaasuitsoq_0.jpg?itok=3N4sVNmd)
Kommunalbestyrelsimimi ilaasortanit 21-viusunit qulit kommuunip avinneqarnissaanut siunnersuuteqarlutik oqaluuserisitsiniarput taasisitsillutillu.
Siunnersuuteqartut tassaapput Siumup kommunalbestyrelsimi ilaasortaatitaasa 13-ijusut ilaat arfineq-marluk kiisalu Atassut tunuliaqutaralugu kommunalbestyrelsimi ilaasortat pingasut.
Taamaalilluni Siumup kommunalbestyrelsimi ilaasortaatitaani 13-ijusuni amerlanerussuteqartut arfineq-marluk kommuunip avinneqarnissaanut siunnersuuteqarput. Qaasuitsup Kommuniani Siumup gruppiata ileqqorivaa gruppiminni amerlanerussuteqartut isumaat taasinerminni malinniartaramikku. Uanili apeqqummi suli nalunarallarpoq gruppi ataatsimut isummerluni taasiniarnersoq imaluunniit ilaasortat ataasiakkaarlutik taasitinniarneqarnersut. Siumup gruppia sapaatiuppat naapeqatigiissaaq. Tamannalu aatsaat tassani aalajangiivigissallugu.
Qaasuitsup Kommuniata avinneqarnissaanut siunnersuut kommunalbestyrelsimut aatsaat qaqilerneqalinngilaq. Kommunerujussuup 2009-mi pilersinneqarneranit kommuunip avinneqarnissaanut siunnersuutit pingasut taasissutigineqareernikuupput. Siullermik 2010-mi novembarimi, tulliani aamma novembarimi 2011-mi kingullermillu Uummannami juunimi 2012-mi aamma qaqinneqaraluarpoq.
Kommuunip avinneqarnissaanut siunnersuutip saniatigut kommunalbestyrelsip kommuunip aappaagumut missingersuutissai oqaluuserissavaat. Matumani aningaasaqarnermut ataatsimiisitaliap kommunalbestyrelsimut innersuussutigivaa kommuuni 2014-mi 45 million koruuninik karsimiittuuteqarluni inissisimassasoq, kiisalu kommuunimut akileraarut 28 procentiusoq aamma allanngortinneqassanngitsoq.