Kommuni akuerineqanngitsunut innersuussisartoq

Tamannalu angajoqqaat narrutsassimaartut paatsiveerussutigaat.

Ippassigami Kommuneqarfik Sermersuumi piorsaanermut ataatsimiititaliami siulittaasoq, Mille Søvndahl Pederseni raatiuaviisimi oqarpoq, meeqqerisut namminersortut inatsisaatsuliortut akuerineqarsinnaanngitsut inerteqqutaasullu.

Tamannalu angajoqqaat marluk paasiuminaatsippaat, kommunimiimmi meeqqerisunut namminersortunut akileraarnerlu ajortunut innersuunneqarsimagamik.

Christina Schnohr ukiup ataatsip missaani utaqqisuniippoq qaammatillu pingasut utaqqisuni siuartarlunilu kinguaqattaartuarpoq:

- Aperigaangatta qanoq iliorsinnaasugut akisarpaatigut paaqqinnittartut kommunimiit akuerisaanngitsut periarfissaasut, Christine Schnohr oqarpoq, nangillunilu:

- Eqqumiigeqaara narrutsallungalu meeqqeriveqarfiup paaqqinnittarfinnut akuerisaanngitsunut innersuuteriarluta, saniatigullu ikilisarniarlugit oqalummata. Tassami politikeriugamik taamatut oqartussaapput, kisianni saaffiginnikkaanni pissutsip allaapput, Christine Schnor oqarpoq.

Anaanaq meeqqerivimmut utaqqisuutilik aalla, Channi Klaris ima oqaluttuarpoq.

- Aperigama qanoq iliorsinnaanerluta uiga sulilissappat meeqqagut paaqqinnittarfimmiittariaqarmata, innersuuppaannga paaqqinnittartut kommunimiit akuerisaanngitsut misilissagigut, Channi Klaris oqarpoq.

Kommuneqarfik Sermersuumit oqaaseqartitsiniaraluaratta ilanngutassiap suliarinerani iluatsinngitsoorparput.