Kommunerujussuarnut qinigaq: Akissaatikippallaassaagut
Avannaani ikaarsaariarnermut ataatsimiititaliami ilaasortanngortoq, Karl Kristian Kruse Niaqornaniit, Kommunerujussuarmi qinikkatut sulinissamini piniartutut inuussutissarsiutimi uninngatinnerini isertitatigut annaasassani sulinerminut atatillugu matussutaasussanit anginerusussaammata, nangialerpoq.
Allattoq Najaaraq Egede
maajip 09-at 2008 17:07
Karl Kristian Krusep piniartutut inuussutissarsiuteqartup nangialerneranut pissutaavoq nalunaarut pineqartoq Namminersornerullutik Oqartussat nalunaarutaat nr. 35. 5. oktober 2001-meersoq, kommuninut ataasiakkaanut naleqqussagaammat kommunerujussuassanut nutartigaanani.
Taamaalilluni isorartussuseq aallaavigalugu sulinermi aningaasarsiat naleqqukkunnaarlutik.
Naalakkersuisut siulittaasuata naalakkersuisoqarfiani pisortaaneq Kaj Kleist oqarpoq ikaarsaariarnermi ataatsimiititaliat, akissarsiat pillugit siunnersuusiortinneqassasut, siunnersuusioreerpata allannguutissaa sanarfineqarluni aallartinneqassasoq.
