Kommunerujussuanngortussat oqartussaaffeqarnerulissapput
KANUKOKA-p ataatsimeersuarnerani kommunerujussuanngortussat siullerpaamik sisamanik sinniisuutitaqarput. Palle Jeremiassen, Siumut, isumaqarpoq Avannaata soqutigisai aallaavigalugit partiilu apeqqutaatinnagu suleriaaseqalernissaq pitsanngoriaataassasoq.
Allattoq Louise M. Kleemann
septembarip 25-at 2008 11:25
- Avannaamioqatigiit ataatsimoorluta oqaluuserisassat eqqartorpavut, taamaalilluta Avannaata soqutigisai aallaavigalugit partii apeqqutaatinnagu saqqummiinissatsinnik piareersarluta. Taamaalilluta anguniakkat assigiinngitsut anngussinnaalerpavut.
Kommuni Kujallermi borgmesterinngortussaq Simon Simonsen, Siumut, isumaqarpoq sinniisuutitat ikileriarnerisigut kujataani kommunit anguniakkanik piviusunngortitsinissaq eqqarsaatigalugu killeqarnerusumik periarfissaqalersut.
- Uatsinnut ajornakkusoorneruvoq. Kisianni aappaatigut malunnarsereerpoq kommunit aningisuunngornermikkut naalakkersuisut tungaanniit isigineqarnerat kivinneqajallattoq, siunissami pimoorusserpalaarnerusumik oqaloqatigiinnerit ingerlanneqartalissapput, Simon Simonsen oqarpoq.
