Kommuneqarfik Sermersuumi atuartut nerisalissapput

Kommuneqarfik Sermersuumi kommunalbestyrelse ippassaq aalajangerpoq kommuneqarfik Sermersuup illoqarfiisa nunaqarfiillu tamarmik atuarfiini nerisaqartitsiniarlerlutik. Sermersuup kommuneani Piorsaanermut ataatsimiititaliami siulittaasoq Mille Søvndal Pedersenip tunngavilersorpaa sooq taama aallartitsinialernerlutik.

- Paasitinneqarpugut Nunatsinni ukioq manna Rapportimi saqqummiunneqartumi meeqqat ilai naammattumik nerisaqaratik atuariartortarsimasut. Taamaattumik meeqqanik assigiinngisitsiniarnata aaliangiupparput Kommuneqarfik Sermersuumi meeqqat tamarmik assigiimmik pineqassasut. Meeqqat peqqinnartunik nerisarnissaq ilikkarniassammassuk aammalu peqqillutik atuartuusinnaanissaat qulakkeerniarlutigu. Taama oqarpoq Kommuneqarfik Sermersuumi Piorsaanermut ataatsimiititaliami siulittaasoq, Mille Søvndal Pedersen.

Taamalu aalajangertoqarsimanera Illoqartoormiuni atuarfiup pisortaanit Gustav Brandtimit tigulluarneqarpoq.

- Nuannersorujussuuvoq tusaratsigu taamatut pilersaaruteqartoqalersoq, tassa atuartuutigut malugisinnaasaratsigit ilaannikkut nererusuppasissusermik takutitaqartartut nukillaangasinnaasarlutik qasoqqallutilluunniit ukiup ingerlanerani pissakilliorfiusut nalaanni. Kisianni taamatut nerisitsisalernissami assorujussuaq ilimagivarput meeqqat nukissaqarnerulissasut eqeersimalerulissallutillu ingerlariaqqinnissamut kajumissuseqalissallutik. Taama oqarpoq Ittoqqortoormiuni atuarfiup pisortaa Gustav Brandt.

Kommuneqarfik Sermersuup taama aalajangiussaqarnera kommuneqarfimmut 7,5 million koruuninik akeqassaaq, kommunellu ingerlatsinermut aningaasartuutinut tunngassuteqartunut Namminersornerullutik Oqartussanut qinnutiginiarpai.