Kommunenut akileraarutit atorunnaarnissaat isumaqatigiinngissutaavoq

Naalakkiinikkut aaqqiinissaq Kommune kujalliup ajorinngilaa Qeqqatali Kommunia manngertitaarpoq.

Akileraartarnermut atugarissaarnermullu isumalioqatigiissitap inassutigaa kommunet namminneq akileraarusiisinnaanerat atorunnaassasoq assigiimmillu nuna tamakkerlugu akileraartoqartalissasoq. Tamanna assigiinnginerusumik atugaqalernissamut aammalu allaffissornerup annikillisarnissaanut aqqutissatut tikkuarneqarpoq.

Naalakkersuisut tamanna orniginartippaat. Aningaasaqarnermut Naalakkersuisoq Maliina Abelsen malillugu isumakulunnartoqarpoq Kommune Kujallermi aamma Qaasuitsup Kommuniani innuttaasut Kommuneqarfik Sermersuumi Qeqqanilu innuttaasunut sanilliullugu 3 procent-imik akileraarnerusarnerat, naak sullissineq pitsaanerulinngikkaluartoq. Allaammigooq sullissineq ajorneruvoq, Kommune Kujalliup borgmesteria Simon Simonsen malillugu.

- Pissutsit ullumikkututut itsillugit nunatsinni akileraarupput qaffasinnersaavoq aammali sullissinerput ajornerulluni, Simon Simonsen oqarpoq.

Taamaammat kommune-nut akileraartarnerup atorunnaarnissaa tapersersorpaa.

- Tamanna kommunet akornanni atukkat assigiinnerulernissaannut aqqutaasinnaappat ajoriffissaqartinngilara, oqarpoq.

Siumup Inatsisartuni gruppea ippassigami oqariartuuteqarpoq taamaasiornikkut kommunet namminneq aalajangiisinnaanerannik arsaarneqassasut. Taamatullu isummertoqarnera Qeqqata Kommuniani borgmesterip Siumukkormiuusup Hermann Berthelsenip isumaqatigilluinnarpaa.

- Naak kommunit nammineersinnaanerat kommunit namminneerlutik akileraarutinik aalajangersaasinnaajunnaarpata taamalu qinersisartunut tamanna pillugu akisussaatinneqarsinnaajunnaarpata, Hermann Berthelsen aperivoq.

Taamatulli aalajangiisinnaanerup iperarnissaa Simon Simonsenip kujataani piareersimaffigaa.

- Aningaasammi pisassavut pisassavavut aammalu naligiinnerusumik inissisimalissalluta. Taava kommunit namminneerlutik aalajangersinnaavaat aniningaasat sumut atorniarnerlugit. Tamanna annertuuliutaasariaqanngikkaluarpoq, Simon Simonsen oqarpoq.

Uanimi kommunit naligiinnerulernissaat anguniarneqarpoq. Tamanna Hermann Berthelsenimut orniginannginnerluni?

- Pissusissamisoorsorinngilara kommunet namminneerlutik akileraarusersuisinnaajunnaarsinnerisigut suliffissaaleqisut amerlinissaat. Naalakkersuisut maanna sakkussaqareerput assersuutigalugu ataatsimut kommunemut akileraartarnikkut aammalu nalimmassaasarnikkut, Hermann Berthelsen akivoq.

Akileraartarnermut aqutsisoqarfiup kommunet kattussortinneqarmatali misissorsimavaa naatsorsueriaatsit nutaat atulernissaat naligiinnerunissaq ujartorlugu. Tamannali kommunit pissaqarnerit tassalu Kommuneqarfik Sermersuup aamma Qeqqata Kommuniata peqataaffigiumasimanngilaat.

Taamaattoq Qeqqani borgmesterip aalajangiusimavaa nalimmassaasarneq aqqutigalugu naligiinnerunissaq anguneqarsinnaasoq.

- Isumaqarpunga oqaloqatigiinneq aqqutissaasoq. Avissaarluta oqalussinnaanngilagut allat qanoq ikiorneqarsinnaanersut. Naalakkersuisut oqaloqatigerusuppakka kommunit akornanni naligiinnginneq qanoq iluarsineqarsinnaanersoq, kommunit akileraarusiisinnaanerat atorunnaarsinngikkaluarlugu, Hermann Berthelsen nalunaarpoq.