Kommunemi suleqatigiilersut nutaat: Demokraatit peersippaat

Inuit Ataqatigiit aamma Naleraq sapaatiummat nutaamik atsioqatigiipput, Kommuneqarfik Sermersuumi Demokraatit ilaajunnaarnissaat pillugu.
Maannalu tassa imaalerpoq Demokraatit peermata kommunalbestyrelseni qinikkatut issiasinnaatitaasuni 19-iusuni, IA Nalerarlu kommunalbestyrelsemi aqqanilinnik issiatitaqalerput,  Assi © : IA og Naleraq
Allattoq Signe Haahr Pedersen , Karline Platou
apriilip 11-at 2022 07:34

Kommuneqarfik Sermersuumi kommunemi politikerit iluanni aalassattoqarpoq, tassami Inuit ataqatigiit Naleqqallu Demokraatit peersippaat.

Siornali kommunemut qinersisoqareernerata kingorna partiit taakku pingasuullutik pissaanermik tigumminnikkaluarput, maannali partiit pingasuujunnaarlutik marluinnanngorput.

Taamalu pisoqarneranut pissutaavoq, Demokraatit arlaleriarlutik IA tunuliaqutaralugu borgmesteriusumut Charlotte Ludvigsenimut tatiginnikkunnaarlutik nalunaartarmata, taama IA-p Naleqqallu tusagassiutinut nalunaarutaanni ippassaq sapaammi atsioqatigiissutaasimasumi allassimavoq, atsioqatigiinnerlu taanna 2025-p tungaanut atassasoq tusagassiutinut nalunaarummi erseqqissaapput. 

- Pingaartumik allaffissornikkut pissutsinik oqallinneq isornartorsiuinerillu ukiup affaata missaani kingullermi politikkikkut sulineq taarmiutissimavaallusooq. Imaanngitsoq allaffissornikkut kukkunerit isornartumilluunniit ingerlatsinerit isornartorsiorneqartassanngimmata uparuarneqarnatilluunniit. Soorunami uparuaasoqartuartartussaavoq, ilutigalugulu pisariaqarfiisigut aaqqiissutissat isumagineqartuartassapput. Pingaaruteqarporli politikkikkut sulinerup suliassallu puiornaveersaarneqarlutik salliutittuarneqarnissaat, borgmesteri taama allappoq.

Kommuneqarfik Sermersuup iluani ukiut kingulliit ingerlanerini arlaleriarluni sulianik kusanaatsunik pisoqartarpoq.

Ilaatigut soorlu, nakkutilliisoqarfimmit paasineqartut ilagaat, ukiuni arlalinni kommune inatsisit malittareqqusaasut unioqqutillugit inissianik kommunimi innuttaasunut attartortitsisarsimasoq.

AAMMA ATUARUK Ineqarneq pillugu suliaq qaffaqqippoq: Nakkutilliisut politikikkut akisussaassuseq pillugu kommunalbestyrelsemik assuarliipput

Aasarlu kingulleq borgmesteri sakkortuumik isornartorsiorneqarpoq, Nuummi coronamut akiuussusertinniarlutik tunuleriiaattorpassuit utaqqisut qaangiinnarlugit akiuussusertissimammat.

Novembarillu qaammataani Demokraatit nalunaarput, Kommuneqarfik Sermersuumi borgmesterimut Charlotte Ludvigsenimut tatiginnikkunnaarlutik piumasaralugulu taassuma tunuarnissaa.

Maannalu tassa imaalerpoq Demokraatit peermata kommunalbestyrelseni qinikkatut issiasinnaatitaasuni 19-iusuni, IA Nalerarlu kommunalbestyrelsemi aqqanilinnik issiatitaqalerput, 

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk