Kommune Kujallermi qinikkat inissitsititertut
Tamanna ataasinngornermi maajip aallaqqaataani pivoq, ilimagineqareersutullu Siumumeersoq Kiista P. Isaksen Kommune Kujallermi borgmesterinngorpoq.
Borgmesterip tullia siulleq tassaavoq Siumumeersoq Simon Simonsen, borgmesterillu tulliata aappaa makitsissutigineqarmat Inuit Ataqatigiinneersumik Henrik Brummerstedtimik inuttalerneqarpoq.
Naak Inuit Ataqatigiit suleqatigiinnissamik isumaqatigiissutaasoq peqataaffiginngikkaluaraat Kommune Kujallermilu illuatungiliuttunngoraluartut, borgmesterip borgmesterillu tulliata aappaata suleqatigiinnissamik kissaateqarlutik oqaatigaat.
- Qularutiginngilara illuatungeriikkaluarluta Kommune Kujallermi innuttaasutsinnik sullissinitta pitsaasuunissaa qitiutillugu suleqatigiilluarumaartugut, Kiista P. Isaksen Henrik Brummerstedt peqatigalugu tusagassiorfinnut nalunaarummi taama oqarpoq.
Borgmesterillu tulliata aappaata naqissuserpaa Inuit Ataqatigiit suleqatigiilluarnissamut nukitik atorniaraat partiilu nammineq siunnerfigisaminik saqqummiussuiumaartoq.
Kommuneqarfik Sermersuumi kommunalbestyrelsimi nutaami inissitsiterineq ullumi marlunngornermi pissaaq.