Kommune Kujalleq suliffeqanngitsunut immikkut iliuuseqalerpoq

Kommune Kujallermi inuit amerlanerusut sulilernissaat anguniarneqarpoq. Sulisoqarnermut ataatsimiititaliap suliniutit arlallit aallartippai, inuillu pilersorneqarnermiit nammineq pilersulernermut sangutinniarneqassallutik. Ukioq manna februaarip qaammataani Kommune Kujallermi suliffeqanngitsut katillugit 521-iupput, illoqarfinnut pingasunut agguarsimallutik.
Allattoq Lotte Holm
marsip 11-at 2009 07:38

Aalajangiisartoqartigiinnik pilersitsisoqassaaq, suliffissaaleqisut sukkanerusumik sulilersinneqarnissaat sulisoqarnermut allaffiup, isumaginninnermut ingerlatsiviup Piareersarfiullu suleqatigiinnerisigut qulakkeerneqassammat.

Aalajangiisartoqatigiit qaammatikkaarlugit naapittassapput, inuit ataasiakkaat qaammatip ingerlanerani suliffissaaleqisutut nalunaarsimasut Suliffissarsiuussisarfimmut saaffiginninnissamut paasitinniarneqartassammata.

- Isumaqarpugut sukkanerusumik suliniuteqarneq angusaqarfiujumaartoq. Suliffissaaleqisutta ilaat pikkorissartinneqassapput, pikkorissaanerit ilinniagaqaqqinnerillu aqqutigalugit sulilernissaminnut piariilivinniassammata, Suliffeqarnermut ataatsimiititaliap siulittaasua, Ole Mølgaard Motzfeldt, Siumut, oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq