Kommune Kujalleq IA-meersumik borgmesterertaalerunartoq
Kommune Kujalleq IA-meersumik borgmesterertaalerunarpoq.
Qinersinermi kisitsisit Kommune Kujallermi illoqarfiup annersaaninngaanneersut maanna kisinneqareersimalersut taama takutitsipput.
Kisitsisillu maannakkutut isikkoqartillugit Inuit Ataqatigiinniit qineqqusaartoq kommunalbestyrelsemilu ilaasortaasoq, Stine Egede 410-inik taaguunneqarsimalluni borgmesterinngortussatut isikkoqarpoq.
Inuit Ataqatigiit 50,9 procentinik taaguunneqarluni maanna partiini kommunimi anginerpaanngorpoq.
- Inuit Ataqatigiinni taaguunneqarnerpaaq borgmesterinngussaaq. Tamanna isumaqatigiissutigaarput, Stine Egede oqarpoq.
Taamaalilluni maannamut borgmesteriusoq siumumeersoq, Kiista P. Isaksen Kommune Kujallermi borgmesteriujunnaarnissaa ilimanarluinnarpoq.
Qineqqusaarutini Narsaq qulequttat pingaarnerit ilaattut qitiulluinnarpoq, tassami Kuannersuit eqqaanni aatsitassarsiulersaarniarnermi partiini assigiinngitsuni isumaqatigiinngissutaalluni eqqartorneqarmat.
Tassami Siumut Greenland Mineralsip suliuniutaa inatsisit malillugit piviusunngortinneqarsinnaappat piviusunngortittariaqartoq isumaqarpoq. Akerlianilli IA uranimik akulinnik aatsitassarsiulersaarniarneq unitsinneqartariaqartoq isumaqarpoq.
- Kuannersuarni aatsitassarsiornissamut suliniutip oqallisigineqarnera aalajangiisuusimarpasippoq. Amerlasuut Kuannersuarnut naaggaarusupput, Stine Egede oqarpoq.
