Kommune Kujalleq aningaasaqarniarnikkut ajornartorsiorpoq

Kommune Kujallermi kommunip karsia qaammatit naalerneri tamaasa imaaruttarmat, aningaasaqarnermut immikkoortortaqarfik assigiingitsunik iliuuseqarluni aningaasassarsiortariaqartarpoq.
Allattoq Jørgen Semionsen
apriilip 06-at 2010 14:47

Kommuunimi sulisut aningaassarsiassaat sapaatip akunnera kingulleq 100.000 koruuninik amigartoorput, taamaattumik kommunimi sulisut pisortanut akiligassallit, peqquneqarput akiligassatik akilissagaat, taamaanngippat kommuunip karsia imaarulluinnassammat.

Ineqarnermut immikkoortortaqarfik 1,1 millioni koruuninik pissaqartitsisoq paasineqarallartillugu sulisut tamakkiisumik akissarsisinnaasimapput.

Meeqqanut tapit ullumikkut tunniunneqartussaagaluit suli maannamut tunniunneqarsinnaanngillat.

Namminersorlutik Oqartussat kommunimut tapiissutaat ikineqarpata meeqqanut tapit agguaanneqassasut, kommunimi aningaasaqarnermut pisortaq Kim Rosendahl neriorsuivoq.

Namminerssorlutik Oqartussat Kommuunimut aningaasaliissutigisartagaat qaammatip aallartinnerani tunniunneqartarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq