Kommune Kujalleq 12 millioninik amigartooruteqartoq

Kommune Kujalliup naatsorsuutitigut angusai 12,2 millionit koruuninik amigartooruteqarfiupput.
 
2017-imi 800.000 koruuninik sinneqartooruteqarnissaq missingersuutigineqaraluarpoq.
 
2017-illi ingerlanerani ilassutitut aningaasaliissutit arlaqartut pissutigalugit missingersuut allanngortinneqarput, 13,5 millionit koruuninik amigartooruteqarnissaq naatsorsuutigineqalerluni.
 
Qujanartumilli amigartoorutigineqartut taama amerlatiginngillat, naatsorsuutigineqartumiimmi 1,3 millionit koruuninik ikinnerupput.

Ilassutitut aningaasaliisoqarneranut atatillugu kommunip aningaasaqarnini siumut saatsinniarsarisimavaa, ilaatigut atorfinitsitsiunnaarallarnikkut, kiisalu sulinermut atatillugu angalanerit unitsikkallarnerisigut annerusunillu pisiortorallarunnaarnikkut. Tamannali naammassinanngilaq.

AAMMA ATUARUK Borgmesterip aningaasaqarnikkut unammillikkat qaangiigaluarluni anigorniarai

Tamatumami kingorna ajoraluartumik paasineqarpoq isumaginnittoqarfimmi qassiitigut kukkusumik missingersuusiortoqarsimasoq taamalu naatsorsuutit inerneri assut ajorseriarsimasut, Kommune Kujalleq ukiumoortumik nalunaarutip saqqummiunneqarnerani taama allappoq.
 
2017-imullu naatsorsuutit inernerisa akuersissutigineqarnissaat pisortaqatigiit inassutigaat,  maluginiarneqarluni naatsorsuutit inerneri naammaginanngilluinnartut, angusallu taama ittut nalaanneqannginnissaat piumasarineqartariaqartoq.
 
Kommunalbestyrelsip ullumi ataatsimiinnissaa Nanortalimmi ingerlanneqartussagaluarpoq angallannikkulli ajornartorsiutit pissutigalugit Qaqortumi pisussanngorpoq.