Kommune annertuumik suliniuteqarniarpoq

Nunatta avannaani ukiukitsut pinngitsaaliisarsimanerinut pasilliinerit pillugit annertuumik paasiniaasoqalerpoq.
Upernaviup eqqaani nunaqarfiit ilaanni pinngitsaaliisoqartarsimanera pillugu sapaatip akunnerata aallartinnerani politiit nalunaaruteqarput.  Maanna kommuuni annertuumik suliniuteqalersoq isumaginnermi pisortaq Henrik Soloy oqarpoq.

- Tassa qanoq pisoqarnersoq tamaat misissuiffigalugu paasiniarlugulu.

Soloyip erseqqissarpaa kommuunip ukiukitsut pillugit suliassat aalajangersimasut qisuariarfigereerai.

- Taakkunani meeqqat angerlarsimaffimminniit qimagutsinneqareerput, sulisuttalu ilaannit angajoqqaajusut ikiorneqarput. Suliaq alianaqaaq amerlasuummi attorneqarput.

Læs også Ukiukitsut peqatiminnik pinngitsaaliillutik atoqateqarsimasutut pasineqartut

Isumaginninnermut pisortaq oqaluttuarpoq Nunatta avannaani isumaginninnerup iluani 2016-imi annertuumik suliniuteqartoqarumaartoq. Inuiaqatigiinnulli tamanut tamanna suliassaasoq.

- Avannaani unammilligassagut tassaapput inuiaqatigiit tamarmik ikioqatigiillutik aaqqitassaat.

Taamaattumik Henrik Soloy aamma nuannaarpoq Namminersorlutik Oqartussat ikiuunniarmata.

Namminersorlutik Oqartussat Qaasuitsup komminialu ataatsimoorlutik 5 aamma 10 millioner koruunit akornanni aningaasaliisimapput. Aningaasat taakku atorlugit Uummannami, Upernavimmi Qaanaamilu illoqarfinni nunaqarfinnilu misissueqqissaassapput.

- Avannaani 2016-imi kivitsingaatsiartoqassaaq, Henrik Soloy oqarpoq, erseqqissarlugulu aaqqiigallarnerit unitsillugit, iternga tikillugu suliniarlutik suliat eqqartukkavut pinaveersaartinniarlugit.

- Suliat assut ilungersunarput. Meeqqanik innarliinerit tassaapput tamanit ilungersunarnerpaat, pisortaq oqarpoq.

Soloyittaaq erseqqissarpaa suliami pineqartumi pasineqartoq tassaammat 13-inik ukiulik, maannakkorpiarlu nunaqarfimmi Upernaviup eqqaaniittumi alla 16-inik ukiulik pinngitsaaliisimasutut pasineqartoq.