Ukiukitsut peqatiminnik pinngitsaaliillutik atoqateqarsimasutut pasineqartut
Politiit suliat angisuut, kinguaassiutinut pinerliinermut tunngasut, tassa Upernaviup Tasiilallu eqqaani nunaqarfinni ukiukitsut pinngitsaaliillutik atoqateqartarsimanerannut tunngasut piffissami kingullermi suliarigaat, Nunatsinni Politiit tusagaassiutinut allapput.
Allattoq Jens Thorin
decembarip 16-at 2015 10:02
Suliami ataatsimi 13-inik ukioqartoq niviarsiaqqanut ukioqatigisanut marlunnut pinngitsaaliilluni pingasoriarluni pinngitsaaliisimasutut pasineqarpoq.
Suliap aappaani 13-inik ukiulik niviarsiaqqamut ukioqatigisaminut ataatsimut pinngitsaalilluni atoqateqarsimasutut pasineqarpoq, pinerloqataasutullu aqqaneq-marlunnik ukiulik pasineqarluni, pinngitsaaliinermi niviarsiaraq aaliangersimasimassagaa pasineqarluni.
Pasineqartut ukiukinnertik peqqqutigalugu pinerluttulerinermi inatsit naapertorlugu eqqartuunneqarsinnaasuunngillat, taamaammallu isumaginninnermi oqartussanut tunniunneqartut, Kommuneqarfik Sermersuumi aamma Qaasuitsup Kommuniani isumagisassanngortinneqassallutik, politiit nangillutik taama allapput.
