Kommunalbestyrelsip ataatsimiittarfianut nooratarsinnaapput
Naalakkersuinermik suliaqartut aamma Namminersorlutik Oqartussani atorfillit Namminersorlutik Oqartussat allaffiat qimattariaqarsimavaat, allafeqarfik ulorianartumik oqoqarneranik pasitsaassineq pissutigalugu.
Namminersorlutik Oqartussat allaffeqarfianni oqoqarneranik Sullivinnik Nakkutilliisoqarfimmit pasitsaassisoqarpoq, tassani Namminersorlutik Oqartussat allaffeqarfii kisimik pineqaratik aammalu Naalagaaffiup Sinniisoqarfia oqummik eqqorneqarsimasutut pasitsaanneqarpoq. Tamanna tunngavigalugu Naalagaaffiup sinniisoqarfia tallimanngorneq apriilip arfineq-pingajuata tungaanut matoqqatinneqarpoq.
Inatsisartut upernaakkut ataatsimiinnerat Kommuneqarfik Sermersuumi kommunalbestyrelsep ataatsimiittarfiani Nuummiittumi ingerlanneqarsinnaanerat misissorneqartoq Inatsisartut allattaanerat Ellen Kolby Chemnitz ullaap tungaani nalunaaruteqarpoq.
Apeqqut taanna pillugu politikerit tusarniarneqaqqaassasut, Ellen Kolby Chemnitzip erseqqissarpaa, akuerineqarpallu Kommuneqarfik Sermersuumi kommunalbestyrelsep ataatsimiiittarfia tallimanngorpat ataatsimiiffigineqarnissaa periarfissaqalissasoq oqaatigalugu.
Oqummik pasitsaassaqarnerup saniatigut Nuummi innaallagissamik qamittoorneq inatsisartut siulittaasoqarfianni sulinermik ajornartorsiortitsivoq.
- Qarasaasiat ikinneqarsinnaasimanngillat, aaqqiissutissanillu ullumikkut aatsaat suliuniuteqarsinnaalluta Ellen Kolby Chemnitz ullaaq naamma taamatut nalunaarpoq.
Inatsisartuni oqaluuserineqartussat pingaaruteqarnerit upernaakkut ataatsimiinnermi oqaluuuserineqassasut, Inatsisartut siulittaasuata Josef Motzfeldtip ippassaq radioaviisimut oqaluttuaraa.
Pingaaruteqannginnerusut inatsisartut ukiakkut ataatsimiineranni oqaluuserineqarumaartut Josef Motzfeldt oqarpoq.
