Inatsisartuni ippassaq aalajangiunneqarpoq, kommunalbestyrelsinngortussani nutaani illoqarfiit tamarmik immikkut ikinnerpaamik ataatsimik ilaasortaatitaqassasut. Tamanna tunngavigalugu naalakkersuisut maanna erseqqissaateqarput.
Naalakkersuisut oqaatigaat kommunerujussuanngortussani ataasiakkaani kommunalbestyrelsimut ilaasortat 17-iussasut.
Nunarput tamakkerlugu kommunerujussuassani sisamaasuni ilaasortaasussat katillutik 68-ussapput, ullumikkullu kommunalbetyrelsinut ilaasortat 168-iupput. Tamanna Demokraatit ernumanartoqartippaat, siulittaasuatalu Per Berthelsenip annilaanngatingaa illoqarfiit tamarmik ilaasortaatitaqassappata, tamanna ilaasortat amerleriarnerannik kinguneqassasoq.
Naalakkersuisulli kommunalbestyrelsinut ilaasortat amerleriarnissaat ilimaginngilaat – kommunalbestyrelsillu ataasiakkaat 17-inik ilaasortaqarnissaat aalajangiusimallugu, Namminersornerullutik Oqartussani pisortaq Kaj Kleist taama allappoq.