Kommunalbestyrelse ataatsimiinngitsoorpoq
Atassutip Inuit Ataqatigiillu Narsami kommunalbestyrelsemi ilaasortaatitaasa immikkut ittumik oqaluuseritikkusutartik itigartinneqarmat, kommunalbestyrelsep juunimi ileqquusumik ataatsimiinnissaraluani oqaluuserisassat itigartillugit ataatsimiinngitsoorput.
Atassut Inuit Ataqatigiillu Narsap kommunalbestyrelseani suleqatigiinnissaminnik juunip arfineq-pingajuanni atsioqatigiipput, juunillu aqqaneq-aappaanni kommunalbestyrelsep ataatsimiinnissaannut oqaluuserisassamik ilanngussiniarnerigaluartik itigartinneqarmat oqaluuserisassat tamaasa itigartitsissutigalugit ataatsimiinngitsoorput.
-Tassa Inuit Ataqatigiillu Atassullu oqaluuserisassamik nutaamik ikkussinissaq kissaatigisimavaat, arfiniliullutik ilaasortat, taannalu akueriumaneqanngimmat ikkunneqarnissaa aalajangiusimavarput oqaluuserisassat akuersissutiginiarnagit kisiannili piumasaqaateqarluta piaarnerpaamik immikkut ittumik ataatsimiittoqassasoq, uku suliassat suliarineqarniassammata kiisalu oqaluuserisassanngortitarput oqaluuserineqarniassammat, Josef Petersen aallartippoq.
Suna oqaluuserisassanngortikkusukkaluarassiuk?
Tassa oqaluuserisassanut inissinniaratsigu, ataatsimiititaliat akisussaaffii ilaatigut allanngortiterniarlugit kissaateqaratta.
Piumasasi pinngikkaangassigit taamatut suleriuseqassagussi, tamanna kommunimut qanoq sunniuteqassasoraajuk?
Neriuppunga siunissami taamaattoqarnavianngitsoq, aamma una ataasiarnertut nalilerusuppara aamma soorunami pisut takutikkumaarpaat, siumut oqareersinnaanngilagut imatut suleriuseqarniarpugut.
Borgmesterip tullia siulleq, Atassummeersoq Josef Petersen oqarpoq.
Kommunalbestyrelsep ataatsimiinngitsoorneratigut ilaatigut oqaluuserisassat annertuut soorlu sanaartugassanut tunngassuteqartut oqaluuserineqanngitsoorput. Tamannalu kinguarsaataassasoq pisorlu ajuusaarnartuunerarlugu Narsami borgmetserip Kiista P. Isaksenip oqaatigaa. Immikkut ittumik oqaluuserisassanngortitsiniarneq akueriinnarsinnaasimannginneraa aperineqarami kommunalbestyrelsep suleriusissatut malittarisassai innersuussutigai:
-Taannarpiaq tunngavigalugu, oqaluuserisassamik immikkut ataatsimiinneq aallartereersoq aggiussineq, taanna siusinnerusukkut aamma uparuaatigineqarnikuummat malitseqqissaarlugu oqaatigivarput suleriaasissaq malillugu sulissagutta oqaluuserisassanngortitsissagaanni piffissaliunneqartoq, tassalu ullunik 30-nik sioqqullugu tunniutereerneqarsimassasoq, taamaammat taanna immikkut akuerinngilara imikkoortullu 22-t kisiisa oqaluuserineqartussat nassiunneqartut malillugit sulissalluta. Tassa taanna akuerineqanngimmat amerlanerussuteqartut, tassa Inuit Ataqatigiit kiisalu Atassutip oqaluuserisassat itigartitsissutigivaat
Partiit Siumut Atassullu Narsap kommunalbestyrelseani suleqatigiikkaluarput, kisianni Atassut Inuit Ataqatigiillu suleqatigiissallutik juuni aallartilaartorli atsioqatigiipput. Narsami Kommunalbestyrelsep aggustip qaammataata ingerlanerani immikkut ittumik ataatsimiinnissaat naatsorsuutigineqarpoq.
