Isumalioqatigiissitap suliassaanut nassuiaat saqqummiunneqarpoq
Tunngaviusumik Inatsisissaq pillugu Isumalioqatigiissitap suliakkiissutinut najoqqutassiassaa tamanut maanna saqqummiunneqarpoq.
Inuiattut juunip ulluisa 21-anni 2021-imi ullorsiulerutta ulloq taanna immikkuullarissuussaaq. Tunngaviusumimmi Inatsisissaq pillugu Isumalioqatigiissitap suliassani tassani naammassisimassappagu Tunngaviusumik Inatsisissap allaqqitassiaasup naammassillugu Naalakkersuisunut tunniunneqarnissaanut ulloq taanna piffissarititaavoq.
- Nuannaarutigaara, Tunngaviusumik Inatsisissaq pillugu Isumalioqatigiissitaq maanna sulilluni aallartissinnaanngormat. Sulinissamut tunngavissaq Suliakkiissutinut najoqqutassiaq suliarilluagaavoq, taassuma qulakkiissavaa Isumalioqatigiissitap pilersinneqartup qulequttanik pineqartumut attuumassutilinnik itisilerinissaminnut pitsaasumik periarfissinneqarnermikkut Tunngaviusumik Inatsisissamik allaqqitassiaasumik suliaqartussanngornerat, Aningaasaqarnermut Nunanilu Avannarlerni suleqatigiinnermut naalakkersuisoq Vittus Qujaukitsoq oqarpoq.
Tunngaviusumik Inatsisissaq pillugu Isumalioqatigiissitami ilaasortat arfineq-marluupput, naalakkersuisunit toqqarneqarlutik. Partiit inatsisartunut qinersinermi kingullermi qinigaatitaqartut innersuussutaat aallaavigalugit ilaasortat toqqarneqarput, naalakkersuisullu ilaasortaasinnaanatik. Arnat angutillu sapinngisamik amerlaqatigiinnissaat aamma siunniunneqarpoq.
Siumup siulittaasussaq toqqassavaa, Siumumi Inatsisartunut siorna 2018-imi qinersinermi taaguunneqarnerpaalluni annerpaavoq.
Isumalioqatigiissitami ilaasortat illoqarfinnut nunaqarfinnullu tamanut sapinngisamik tikinnissaat sulissutigineqassasoq, Isumalioqatigiissitap suliassaanut nassuiaammi ilaatigut allassimavoq, suliap killiffii tassani nassuiarneqartassallutik.
Innuttaasut kikkulluunniit, meeqqat, inuusuttut, inersimasullu, siunnersuutinik Isumalioqatigiissitamut nassiussisinnaasut, Isumalioqatigiissitap suliassaasa nassuiarneqarneranni ilaatigut aamma allassimavoq.
Tunngaviusumik Inatsisissaq pillugu Isumalioqatigiissitap suliaa naammassippat, tunngaviusumik inatsisissap ilusissaanut tamanut ammasumik oqallinnissamut tunngaviliissaaq, innuttaasut taasitinneqarnissaat tassunga aamma ilaasinnaalluni, naalakkersuisoqarfik taama allaaserisaqarpoq.
Kikkut isumalioqatigiissitami ilaasortaassanersut sapaatip-akunnerata naanerani saqqummiunneqarsinnaanissaat neriuutigigitsik, naalakkersuisoqarfiup nalunaarutigaa. Partiimmi ilaasa innersuussutaat suli amigaartigineqarmata.
