Kommissionip ikummatissat pillugit siunnersuutai saqqummerput

Kommissionip tikkuagai tassaapput anorimit nukissiuutit aamma orpinnit naasunillu ikummateqarneq aamma biilit innaallagissamoortut biilillu allanik soorlu nukissiuutinit ataavartuneersunit ikummatillit, biilinik uuliatortunik benziinatortunillu taarsiiartuaartussat.

- 2030-mi nunarsuatsinni uuliap pisariaqartinneqartussap affaa sinnilik, suli nassaarineqanngilaq. Nunarsuatsinni uuliaqarfiit ilisimasatta affai sinneqartut Kangiani Qiterlermiipput, uuliallu pissarsiariniarnissaa akitsoraluttuinnarluni. Ikummatissat uuliameersut assigisaalu akitsoraluttuinnassasut aamma nukissiuutit ataavartut akikilliartuinnassasut qulakkeerlugu paasereerparput, kommissionip siulittaasua Katherine Richardson oqarpoq.

Nalunaarusiap imaa silap pissusaanut nukissiuuteqarnermullu ministerip Lykke Friisip nuannaarutigaa, taallugulu "periarfissanut katersivik" periarfissanik ulikkaartoq. Kisianni:

- Nalunaarusiamiittut piviusunngortinneqassappata tamanna inuit inooriaasiannik allanngortitsissaqaaq, sulilu manna tikillugu arlaannillunniit suli iluatsinneqanngitsoq, ministeri oqarpoq.

Ikummatissanut uuliameersunut assigisaannullu akileraarut - tassa aamarsuit, uuliap gassillu akileraarusernissaat - nukissiuutinik atuinermik allanngortitsinissamut aqqutissaasut, kommissionip tikkuarpaa. Tamanna pillugu silap pissusaanut nukissiuuteqarnermullu ministeri ima oqarpoq:

- Nalunaarusiap misissoqqissaarnissaanut piffissaqartariaqarpugut, taannalu aallaavigalugu innersuussuteqarluta. Matumanimi eqqarsaatiginiagassavut tassaapput silap pissusaa, nukissiuuteqarneq unammillersinnaanerlu, taamaaliornitsigummi suliffeqarfiit qimarngutilernissaat pinngitsoortissinnaassagatsigu.

Naalagaaffiit Peqatigiit silap pissusaa pillugu Mexicomi novembarimi ataatsimeersuartitsinissaa sioqqullugu, kommissionip innersuussutai tunngavigalugit silap pissusaanut nukissiuuteqarnermullu ministerip pilersaarutini saqqummiunniarpai.