Kollegiat amerlinissaat pimoorutilerpaat
![](/sites/default/files/styles/image_934x467/public/article_images/byggeri_2_630_11.jpg?itok=Y3X6Dv70)
Nuummi ilinniartut inissaat nutaat 42-t sananeqarnissaat Ineqarnermut naalakkersuisup Jens B. Frederiksenip ilisimatitsissutigaa.
Aningaasartuutaanerunngitsumik sanaartornermut aningaasaliissutit iluini 16,9 millionit koruuninik nikisitsisoqarnissaa, Naalakkersuisut Aningaasaqarnermut ataatsimiititaliamut innersuussutigigaat, taassuma ilisimatitsissutigaa.
Taamaliornikkut Nuummi ilinniartut inissaat 42-t nutaat sananeqarnissaat Naalakkersuisunit anguniarneqarpoq. Ineqarfissat nutaat 2012-imi aggustimi iserterfigineqarnissaat pilersaarutaavoq.
Tamatumunnga atatillugu Jens B. Frederiksenip ilisimatitsissutigaa, Nuummi ilinniartut ineqarfiinik ikinnerpaamik 175-it missaannik pisariaqartitsisoqartoq.
- Inuusuttut ilarpassui angajoqqaaminni suli najugaqarput allallu illoqarfimmi inissianik attartorlutik ineqarlutik. Taamaalilluni Nuummi ilinniartut ineqartinniarnerat kinguaattoorfiujuarpoq, tamatumalu saniatigut ineqarfiit ilaasa oqunnerat ajornartorsiutigaarput. Taamaattumik nunarput tamakkerlugu ilinniartut ineqarfiisa pitsanngorsaavigineqarnissaat ukiuni aggersuni sulissutigissallugu pingaartissavarput.
- Ilinniagaqartut amerlanerulernissaannik suliniuteqarneq iluatsissappat, ilinniartut ineqartitaanerat ilanngullugu ilungersuutigisariaqarparput, Ineqarnermut naalakkersuisoq Jens B. Frederiksen oqarpoq.