Kofoedskolemi pisortaq: Kalaallinik atugarlortunik sullissinermi naammagittartariaqarpoq
Kalaallit atugarliortut pillugit atuagaq ukiut pingasut matuma siorna saqqummermalli kalaallit Danmarkimi najugallit immikkut ittumik maluginiarneqalerput.
Kalaallit atugarliortut sullinnerini naammagittarsinnaaneq pingaaruteqarpoq. Kalaallit atugarliortut inissaarunnermik, suliffissaarunnermik atornerluinermik inuttullu artorsarnerup saniatigut ajornartorsiutaat itinerusujussuusarput.
- Ilaanni misinnartarpoq kalaallit maani atuartuutigut ajuallajasoorujussuusartut. Ilaasa nalaattagaat sakkortusartorujussuupput allaat ikiortissarsiorsinnaanertik sapertarlugu, ajukkuttunngorsimasaramik, Århusimi Kofoedsskolemi pisortaasoq Lise Jensen oqarpoq.
Kofoedsskolimi atuartut 120-t missaanniipput. Taakkunannga 5 procentit 10 procentillu akornanni kalaallit danskisut atuarnermut allannermullu ilinniartarput, atuarfiullu sannaviini sanaluttarlutik.
Kofoedsskolemi inunnik siunnersortit kalaallit Danmarkimi isumaginninnikkut ikiorserneqartartut nammineernerulernissaat anguniarlugu ikorfartortarpaat taamaalillutillu kalaallit ilaat ajornartoornerminnit anigueratarsinnaasarlutik. Tamanna iluatsissappat pingaaruteqarpoq atuartut namminneq pisariaqartitaminnik oqaasertalersuinissaat, pisortaq Lise Jensen nassuiaavoq.
- Kalaallit namminneq ikorfartorneqarnerminni pisariaqartitaminnik kissaatiminnillu oqaasertalersuinissaat pingaarnerpaatut isigisarparput. Sapinngisarpullu naapertorlugu ikorfartuinitsinni peqataatinniarsarisarpagut, Lise Jensen oqarpoq.
Kalaallit atuartut piffissaqarfigalugit tusarnaarsimanngikkaanni erngerlutik malunnarsisartut Lise Jensen ilanngullugu oqarpoq.
- Kalaallit maluginiarsimanngikkaangatsigit malunnartarpoq tatigiunnaarluta tunuttaraatigut aamma ikiorneqarnissaminnik pisariaqartitsinertik kimigiiserutigineq ajorpaat, Lise Jensen naggasiivoq.
Århusip kommuneani kalaallit 1000-t missaanniissasut Århusimi kalaallit illuannit nalunaarutigineqarpoq. Århusip kommuneani innuttaasut katillutik 300.000-t missaanniipput.
