Kofoedskolemi aqutsisoq: Siunertaqanngikkussi Danmarkimut nuussanngilasi

Tassuma misilittakkani malillugit oqaatigaa kalaallit inuusuttut amerlavallaartut ukiuni kingullerni, inissaminnik, suliffissaminnik imaluunniit ilinniarfissaminnik qulakkeerinneqqaarsimanatik nuuginnartartut takussaajartuinnartut.

- Pingartorujussuuvoq kalaallit inuusuttut inuunerminni aalajangersimasumik pilersaaruteqaratik Danmarkimut nuuginnartannginnissaat. Danmarkimut nuunniutigiinnarlugu nuuttoqartaqartarnissaa innersuussutiginanngitsorujussuuvoq. Isumaqartoqassanngilarmi Danmarkimut nuunnermi inuuniarneq pitsaanerulissasoq, pingaartumik Københavnimi. Tassami tamaani initaarnissaq, suliffitttaarnissaq imaluunniit ilinniarfissamik nassaarnissaq ajornakusoortorujussuusinnaasarpoq, Kurt Olsen oqarpoq.

Taassuma oqaatigaa, kalaallit inuusuttut ulluinnarni akisussaaffimmik Danmarkimi paarisaqanngikkaangamik, kalaallit inuuniarnikkut ajornartorsiuteqartut amerlasuutigut naapittagarilertaraat, amerlasuutigullu imigassamik annertuumik atuisunngortarlutik.

- Ajuusaarnaraluartumik takusarpagut kalaallit inuusuttut imigassamik atornerluisuunngikkaluarlutik maanga pigaangamik atornerluisunngortartut, tamakkuninnga atornerluisut akornanniilertaramik, tassami kalaallit allat immaqa suliffeqarlutik imalunniit ilinniakkaminnik nakkutiginnillutik pisarmata piffissaqarpallaassanatillu allanik naapitsinissaminnut. Taamaattumik innersuussutiginngilara inuusuttut tamakku pilersaaruteqanngikkunik Danmarkimut nuuttarnissaat, Kurt Olsen oqarpoq.

Taassuma aamma oqaatigaa kalaallit inuusuttut Danmarkimi ajornartorsiortuullutik inuuleraangamik imminnut tatiginerat mikinerulersartoq.