Kofoeds Skole Kunngissakkut isumaginninnikkut nersornaasiuttagaannik nersorneqartoq
Kofoeds Skole immikkuullarissumik ippassaq nersornaatisivoq. Atuarfik Nuummi immikkoortortaqarfeqartoq Kunngissakkut isumaginninnikkut nersornaasiuttagaanik tunineqarpoq. Tamanna pivoq Kunngissakkut nersornaasiuttagaat DR-ikkut toqqaannartumik aallakaatitsinneqartumi.
Nersornaat 500.000 koruuninik aningaasartaqarpoq. Isumaginninnikkut immikkut maluginiartarialinnik suliaqartunut nersornaasiuttagaalluni. Kofoeds Skole inuinnut inuuniarnermikkut ajornartorsiuteqartunut imminnut ikiornissaannut aqqutissiueqataasuusumut tassa ukioq manna nersornaat tunniunneqarpoq.
Kofoeds Skole pillugu
• 1928-mi pilersinneqarpoq.
• Inuinnut inuuniarnermikkut ajornartorsiuteqartunut aqqutissiueqataanermik suliuaqartoq.
• Københavnimi, Aarhusimi, Aalborgimi Nuummilu immikkoortortaqarfeqarpoq.
• Atuarfik aqqaneq-marlunnik sannaveqarpoq ilinniarfiusinnaasunillu 100-it ikinnerunngitsunik periarfissaqarluni. Taakku saniatigut isumaginninnermut siunnersortinik, eqqartuussissuserisunik, ilaqutariinnut siunnersortinik, tarnip pissusianik ilisimasalinnik katsorsaasunillu ikiorneqarnissamut periarfissaqarpoq.
• Kofoeds Skole inuusuttunut najugaqarfiuteqarpoq, inuusuttunut angerlarsimaffeqanngitsunut 45-inut inissaateqarluni.
Paasisat: Bikubenfonden
- Kofoed Skole naaralaartitsivimmut assersuunneqarsinnaavoq. Atuarfik nuna tamakkerlugu nunanilu tamalaani isumaginninnikkut suliaqartoq, imminnut nassaareqqinnissamut aqqutissiuisoq - taamaammat Kunngissakkut isumaginninnikkut nersornaasiuttaagaanik nersorniarneqartariaqarpoq.
Kunngikkormiutut ataqqinassusilik Kronprinsesse Mary taama oqarpoq.
Aqutsisoq tulluusimaaqisoq
Atuarfik Nuummi, Københavnimi, Aarhusimi Aalborgimilu immikkoortortaqarfeqarpoq. Atuarfiillu aqutsisuata tulluusimaaqisup nersornaat arfininngornerup unnukkuani tiguaa.
- Isumaginninnikkut nersornaasiuttaakkamik nersorniarneqarnerput maluginiarneqarnerpullu qujassutigaarput, Robert Olsen oqarpoq.
Kunngissakkut nersornaasiuttagaat Bikubefondimiit 2004-mi katimmata tunissutitut pilersinneqarpoq. Randersimi ukiut tamaasa nersornaatinik agguaassisoqartarpoq.00:01:53
Kunngissakkut isumaginninnikkut nersornaasiuttagaat kulturikkullu nersornaasiuttagaat tunniunneqartartuni annersaraat. Kunngissakkut kulturikkut nersornaataat Danica Curcicimut ukioq manna tunniunneqarpoq.
