Kodap nersornaasiuttagaasa agguaanneqarnerat iluatsilluarpoq
2008-mut nersornaatisivoq Herluf Møller, nipilersoqatigiinnit HEJ-ikkunneersoq, cd-liaannit Ukioq-mut. Isumalluarnartumut nersornaat 2008 tunniunneqarpoq rappertartunut JospalG, Feat, Don Maliko, kiisalu Ataqqinaammik nersornaat 2008 Ole Kristiansenimut tunniunneqarpoq.
Juaaka Lyberth, nammineq nipilersortartuusoq erinniortuullunilu, aamma nersornaatisivoq. Taanna tassaavoq "Very special KODA award", KODA nersornaasiisalermalli pernaammik tunniunneqartoq. Timersortarfissuarmimita inuit qanoq issimappat?
- Taakku pissanngassimaqaat, tassami immikkoortuni pingasuni tamarmik immikkut pingasut aamma siunnersuutaanikuummata, taamaattumik ilisimannginnamikku kina - imaluunniit kikkut - nersornaaserneqassanersut assorujussuaq pissangarrannikuupput. Taava unnuup ingerlanerani saqqummiunneqaraangat kikkut nersornaaserneqassanersut nuannaarujussuartarput. Aamma kingornatigut nuannaartorujussuupput, nalunngiaratataq ilaquttaminnut sianertarlutillu attaveqartarlutillu nuannaartorujussuusut, assorujussuaq tulluusimaarput, Juaaka Lyberth oqarpoq.
Illit aamma immikkut akissarsisitaavutit, qanoq misinnarpa?
- Nuannersorujussuuvoq, kisianni siullermik tupaqaanga, pakasartippunga. Arlaleriarlunga erseqqissumik oqartarnikuugama naliliisartunut ilaasortaalluni nersornaaserneqartussanut piukkussaaneq tulluarsorinnginnakku akuererusunnagu, kisianni tassa taamaakkaluartoq KODArmiut naluara naliliisartoqatikkaluunniit peqataasimanersut, tassa isaasalerlugu tunoqqullunga taamaaliorsimapput, kisianni tassa tuppallernartorujussuuvoq nuannersorujussuullunilu, suliakassaakka inuit allat maluginiarsimasarmatigik.
Nina Kreutzmann Jørgensenip tusarnaartitsinera qanoq ingerlasimanersoq apeqqutigigatsigu, Juaaka Lyberth ima akivoq:
- Unnuk nuannersorsuaq nuannernerpaanngorlugu naggaserpaa, tassa aallaqaataaniit nipilersorluni aallartikkami inuit timersortarfik ulikkaarluinnaqqissaartoq nuannaaqisullu pikkunartorujussuarmik nipilersorfigai, taamaattumik unnuk taanna ataatsimut isigalugu immaqa naliitsuuvoq, taama oqarsinnaagunarpunga, aamma sisimiormiut tusarnaartorissallugit nuannersorujussuummata.
Nersornaasiinerup saniatigut aamma checki 20.000 koruuninik nalilik tunniunneqarpoq, sumut atussamaarpigit?
- Tassa tupannermik allamik oqaasissaarukkama oqaannarpunga pujortassanangalu, imissanangalu allasiussanangalu oorit sumut aamma atussavakka, arlaanut aasiit atorfissaqassajunnarsipput, Juaaka Lyberth illarluni naggasiivoq.
