Knut Berlinimiiginnassaaq
Matumani pineqartoq tassaavoq, nanoq Knut!
Nanuaraagallarami inequnarnini pissutigalugu nunarsuarmiunit tamanit soqutigineqalersoq taanna, arnaminit qimanneqarnermi kingornagut, Berlinimi uumasuusivissuarmi sulisumit immuttortinneqartarnermigut perortoq, maanna Berlinimiuissuartut imminut taasinnaalerpoq.
Nanoq nuannarineqaqisoq taanna Tysklandimi illoqarfiit pingaarnersaanniiginnassaaq, tamanna pivoq Tysklandip avannaani illoqarfiup Neumünsterip uumasuusivissuata Knutip utertinnissaanik piumasaqaatini taamaatiinnareeraalu.
Tassami Knutip paarsisua, Knut nanuaraagallarmat Berlinimi uumasuusivissuarmut atukkiunneqarsimagami. Taamaattorli Knutip arnaata piaqqani soqutigiunnaarmagu paarsisullu nanuaraq akisussaaffigilermagu, uumasuusivissuarmut takuniaaniartorpassuit aningaasanik isaatitsilerput. Inuit 7 millionit sinneqartut nanuaraq takuniarsimavaat - taamaaleriarmallu Neumünsterimi uumasuusivissuaq iluanaarutit ilaannik soqutiginnilerpoq.
Taakkumi aamma pissarsitinneqareerput - tassa qaammatini marlunni eqqartuussisulersuisoqareersorlu 3,2 millionit koruunit nalinginik pissarsigamik, taama pisoqarmat Berlinimi uumasuusivissuup Knutip qassiiliuutigineqaqqinnissaa kissaatigiunnaarpaa, maannami taanna nanorujussuanngoreersimavoq ipertooq, taamaattorli suli takuniarneqarluartartoq. Neumünsterimilu uumasuusivissuarmi piginnittorisimasaralui tunniutiinnarput oqarlutillu:
- Knut maanna Berlinimiuissuanngorpoq, Peter Drüwa Neumünsterimi uumasuusivissuup pisortaa oqarpoq.
