Knud Rasmussenip Højskolia allagartartaartitsivoq
Sisimiuni Inuunerup Atuarfianik ingerlatsisimasut ullumi allagartartaassapput. Nalliuttorsiorsiorneq nalunaaqutaq arfineq-pingasuniit erfalasumik amusinikkut aallartinneqarpoq, ullaakkorsioqatigiittoqareerpallu qulinut allagartanik tunioraasoqassaaq.
Knud Rasmussenip Højskoliani 2007-imi ilinniartut allagartartaartinneqassapput, tallimanngorneq 18. maj 2007, nal. 10:00, højskolip inersuaani.
"Inuunerup Atuarfia"-ni ilinniarneq januaarip qiteqqutilerneraniit maajip 18-anut ingerlanneqarpoq, ilinniartullu 40-t aallarteqataapput. Ilinniarnerup naammassinerani ilinniartut 35-t allagartartaartinneqassapput, tallimallu maanaannakkut unittariaqarsimapput.
Qaammatini sisamani ilinniartoqarnerani ilinniartut assigiinngitsorpassuarnik aqqusaagaqarput, ilaatigut Danmarkimut paasisassarsiortoqarluni. Ilinniartut assigiinngitsorpassuarnik piginnaasaqarluartut takutitsilluarsimapput, soorlu erinarsornikkut, nipilersornikkut eqqumiitsuliornikkullu. Inuusuttut piumassuseqarluartuupput, qiimasuullutik aammali inuunerup oqimaatsortaanut paasinnilluartuullutik, taama ilinniartitsisoq Ole Petersen nalunaarpoq.
