Knud Ramussenip ullorsiutai nittartakkamiilerput
Knud Rasmussenip ukiut 1900-it aallartisimalerneranni angalanermini ullorsiutit allagarisimasai 44-it nittartakkami atuarneqarsinnaalerput. Ullorsiutit taakkua Københavnimi atuakkanik atorniartarfimmi Det Kongelige Bibliotekimi taamaallaat atuarneqarsinnaasimagaluarput.
Paasissutissat uppernarsaatillu atorneqarnissaannut pissarsiarinissaasa ajornannginerulernissaat kissaatigineqarmat, nittartakkakkut pissarineqarsinnaalerput, atuakkanik atorniartarfiup nittartakkamini tamanna nalunaarutigaa.
Knud Rasmussen issittumi ilisimasassarsiornermi siuttutut sulivoq, naggueqatigiillu inuit oqaluttuatoqaasa pigiinnarnissaannik suliniuteqarnermini pingaaruteqarluni.
Naggueqatigiit Inuit atortuinik tuusintit sinnerlugit amerlassuseqartunik katersinermigut Knud Rasmussen inuit kulturiannik ilisimatuussutsikkut paasisai pingaaruteqarput, katersukkat taakkua Danmarkimi katersugaasivissuarmi Danmarks Natinalmuseumimi katersugaataappput.
