KNR Voicep tunngavia tammarpoq
KNR-ip Voice of Greenland ukiup aallartilaarnerani pisiaraa. Inuusuttunut tusagassiisalernissaq siunertaavoq. Ussassaarutinik aningaasalersorneqassasoq taamaalillunilu KNR-ip suliaminit allanik aaningaasanik ilanngartuinani inuusuttunut tusagassiisarnini sivitsussagaa pilersaarutigineqarsimalluni.
Pilersaarulli ajalusoorpoq.
Misiliigaluarneq iluatsinngitsoq
Radiop Nuummiinnaq aallakaatitsisinnaanermik akuersissuteqartoq ingerlaannassasoq KNR-ip siulersuisuisa naatsorsuutiginnikkamik kukkusimapput.
Tassa KNR Voice Nuummut FM-ikkut aallakaatitsisassasoq, FM-ikkullu aallakaatitsissut sakkortusineqanngikkallartillugu Nunatta sinneranut isiginnaarutikkut nittartakkakkullu tusarnaarneqarsinnaassasoq aaqqissuunneqarluni.
- Ilimagineqarsimavoq KNR Voicip Nuummi FM-ikkut aallakatitsisinnaanera pigiinnarneqassasoq, KNR-ip pisortaa Jacob Abelsen oqarpoq.
Aamma atuaruk KNR-ip inuusuttunut radio tuniniarpaa
Taamaattoqanngilarli. KNR-ip nuna tamakkerlugu aallakaatitsinissaq pisussaaffigaa. Kanalillu isiginnaarutikkut nittartakkakkullu taamaallaat tusarnaarneqarsinaanera iluarineqanngilaq.
Aningaasaliisussaaruppoq
KNR-ip Nuummi aallakaatitsisinnaanermut akuersissut annaavaa, ussassaarutinillu aningaasalersuisueruppoq. Aningaasassaarullunilu.
- KNR Voici akilersinnaasumik ingerlanneqarsinnaasimanngilaq.
Aamma atuaruk Inuusuttut kanaalissartik nuannaarutigaat
FM-i aqqutigalugu nuna tamakkerlugu aallakaatitsisinnaanermik periarfissanik ujartuisoqarsimagaluartoq Jakob Abelsenip naqissuserpaa.
Ussassaautinik tunisisinnaajunnaarnerup KNR Voice ipisippaa
Tamannali 4,5 millioninik naleqarpoq. KNR-i ussassaarutitigut isertitsisarunnaassasoq politikkerinit pilersaarutigineqarmat, inuusuttunut kanalip pigiinnarnissa KNR-ip aningaasaqarneranut naapertuukkunnaarpoq.
- 4,5 millioninik aningaasaliisinnaanngilangut nalornissutigalugu aappaaguminngaanniit imaluunniit 2017-iminngaanniik KNR-imi ussassaarisinnaaneq mattunneqassagaluarpat. Silatusaarnerunngilaq taamannak aningaasaliissalluni, Jacob Abelsen oqarpoq.
Taavami 4,5 millioninik aningaasaliinissaq sianiilliornerussaaq, uffa nalunagu aningaasaliissutit sivikitsuinnarmi sunniuteqassasut.